మూడేళ్లయినా అమలుకాని రూ.4 వేల పెన్షన్ హామీ!
కొండాపూర్ ; కాంగ్రెస్ పార్టీ ఎన్నికల మేనిఫెస్టోలో ఇచ్చిన మేరకు రూ.2,016 ఉన్న వృద్ధాప్య, వితంతు పెన్షన్లను రూ.4 వేలకు పెంచుతామని ప్రకటించినా మూడేళ్లు గడుస్తున్నా అమలు చేయడం లేదని బీఆర్ఎస్ నాయకుడు ఎర్రోళ్ల రవి విమర్శించారు. గతంలో కేసీఆర్ ప్రభుత్వం వృద్ధులకు, వితంతువులకు రూ.2,016, దివ్యాంగులకు రూ.3,016 పెన్షన్ అందించిందని గుర్తు చేశారు. కాంగ్రెస్ ప్రభుత్వం అధికారంలోకి వచ్చిన తర్వాత పెంచిన పెన్షన్లు ఇస్తామని హామీ ఇచ్చి ఇప్పటివరకు ఎలాంటి స్పష్టమైన మార్గదర్శకాలు విడుదల చేయలేదన్నారు. వృద్ధాప్య పెన్షన్ల కోసం ఎదురుచూస్తున్న వృద్ధులకు ఎప్పుడు న్యాయం చేస్తారని ప్రశ్నించారు. ఎన్నికల సమయంలో ఇచ్చిన రూ.4 వేల పెన్షన్ హామీని వెంటనే అమలు చేయాలని ఎర్రోళ్ల రవి డిమాండ్ చేశారు.