మరికల్‌లో నాటుసారా విక్రయాలకు అడ్డుకట్ట వేయాలి
ప్రజావాణిలో అధికారులకు వినతి.. గ్రామస్తుల సంక్షేమం కోసం నాయకుల చొరవ
పెద్దకొత్తపల్లి. సూర్య న్యూస్ : మండల పరిధిలోని మరికల్ గ్రామంలో నాటుసారా విక్రయాలను పూర్తిగా అరికట్టాలని మాజీ ఉపసర్పంచ్ జగన్, వార్డు సభ్యుడు కావలి శివుడు కోరారు. సోమవారం ప్రజావాణిలో ఎంపీడీవో శ్రీరాములుకు వినతిపత్రం అందజేశారు. గ్రామంలో నాటుసారా విక్రయాలపై ప్రజలు ఆందోళన చెందుతున్నారని, మద్యం సేవించిన కొందరు రాత్రివేళల్లో మహిళల పట్ల అసభ్యంగా ప్రవర్తిస్తూ గొడవలకు దిగుతున్నారని తెలిపారు. ఈ పరిణామాలతో కుటుంబాలు ఆర్థిక ఇబ్బందులు, అనారోగ్య సమస్యలు ఎదుర్కొంటున్నాయని పేర్కొన్నారు. ఎక్సైజ్, పోలీస్ అధికారులు క్షేత్రస్థాయిలో విచారణ జరిపి, అక్రమ విక్రయాలు నిర్ధారణ అయితే బాధ్యులపై చట్టపరమైన చర్యలు తీసుకోవాలని విజ్ఞప్తి చేశారు. గ్రామ సమస్యపై స్పందించి ప్రజావాణిలో ఫిర్యాదు చేసిన నాయకుల చొరవను గ్రామస్తులు అభినందించారు. ఈ కార్యక్రమంలో పుట్ట విష్ణు, పల్లపు లింగస్వామి, ఎర్రమోని కురుమయ్య పాల్గొన్నారు.
