మల్లారెడ్డి సేవలు చిరస్మరణీయం 24వ వర్ధంతి సందర్భంగా ఘన నివాళులు అనాథ పిల్లలకు అన్నదానం

జిన్నారం;బొల్లారం డివిజన్ పరిధిలోని కొత్త బస్టాండ్‌, వాటర్‌ ట్యాంక్‌ సమీపంలో ఉన్న గాంధీనగర్‌ కాలనీ వ్యవస్థాపకులు, మాజీ వార్డు సభ్యులు స్వర్గీయ మల్లారెడ్డి 24వ వర్ధంతిని ఆదివారం ఘనంగా నిర్వహించారు.ఈ సందర్భంగా ఆయన కుమారుడు, మాజీ వార్డు సభ్యుడు, సీనియర్‌ నాయకుడు యాదిరెడ్డి మల్లారెడ్డి విగ్రహానికి పూలమాల వేసి ఘనంగా నివాళులర్పించారు. ఈ సందర్భంగా మల్లారెడ్డి కుటుంబ సభ్యులు, అభిమానులు, కార్యకర్తలు ఆయన చేసిన సేవలను స్మరించుకున్నారు. బొల్లారం ప్రాంత అభివృద్ధికి మల్లారెడ్డి చేసిన కృషి మరువలేనిదని పేర్కొన్నారు. గాంధీనగర్ కాలనీ అభివృద్ధికి పునాది వేసి, ప్రజలకు అందుబాటులో ఉంటూ వారి సమస్యల పరిష్కారానికి కృషి చేసిన ఆయన సేవలు చిరస్మరణీయమని యాదిరెడ్డి కొనియాడారు. మల్లారెడ్డి వర్ధంతిని పురస్కరించుకొని అనాథ పిల్లలకు అన్నదాన కార్యక్రమం నిర్వహించారు. ఈ సందర్భంగా పిల్లలకు భోజనం అందించి సేవాభావాన్ని చాటుకున్నారు. మల్లారెడ్డి ఆశయాలను కొనసాగిస్తూ సేవా కార్యక్రమాలు నిర్వహించడం ఆయనకు అందించే నిజమైన నివాళి అని పలువురు పేర్కొన్నారు. ఈ కార్యక్రమంలో మల్లారెడ్డి కుటుంబ సభ్యులు, అభిమానులు, కార్యకర్తలు, స్థానికులు తదితరులు పాల్గొన్నారు.