తుఫాను నేపథ్యంలో రైతులు అప్రమత్తత అవసరం * సూచనలు అందజేసిన మండల ఏవో మెట్ట మోహనరావు *

ఆమదాలవలస, సూర్య : తుఫాను, భారీ వర్షాల సూచనలు అందిస్తున్న నేపథ్యంలో రైతులు ముందస్తు జాగ్రత్తలు పాటించి పంట నష్టాన్ని తగ్గించుకోవాలని ఆమదాలవలస మండల వ్యవసాయ అధికారి మెట్ట మోహనరావు సూచించారు. వరి కోతలు వాయిదా వేసుకోవాలని, కోతకు సిద్ధంగా ఉన్న పంటలను వాతావరణ పరిస్థితులు అనుకూలంగా ఉన్నప్పుడు కోత కోయాలన్నారు. పొలాల్లో మురుగు కాలువలు, గెడ్డలు శుభ్రపరిచి, నీరు బయటకు వెళ్లే మార్గాలను సిద్ధం చేసుకోవాలి. పంట కోత చేయాల్సిన పరిస్థితి ఉంటే వెంటనే కోసి ధాన్యాన్ని టార్పాలిన్లతో కప్పి, ఎత్తైన సురక్షిత ప్రదేశంలో భద్రపరచాలి.భారీ వర్షాల హెచ్చరిక ఉన్నప్పుడు ఎరువులు,పురుగుమందుల పిచికారీ నిలిపివేయాలి. విత్తనాలు, ఎరువులు, వ్యవసాయ పరికరాలను తేమ చేరని సురక్షిత ప్రదేశంలో ఉంచాలి.నీటిని తోడే పంపులు, పైపులు, టార్పాలిన్లను సిద్ధంగా ఉంచుకోవాలి.తుఫాను సమయంలో పొలాల్లోకి వెళ్లకుండా, సురక్షిత ప్రదేశంలో ఉండాలి. తుఫాను అనంతరం పొలాల్లో నిల్వ ఉన్న నీటిని బయటకు పంపాలి. పంట నష్టం వాటిల్లితే ఫొటోలతో నమోదు చేసి, సంబంధిత గ్రామ వ్యవసాయ సహాయకులకు సమాచారం అందించాలి. పంటల్లో తెగుళ్లు,  వ్యాధుల లక్షణాలు కనిపిస్తే వ్యవసాయ అధికారుల సలహా మేరకు నివారణ చర్యలు చేపట్టాలి.రైతులు వ్యవసాయ శాఖ సూచనలను పాటించి పంటలను కాపాడుకోవాలని విజ్ఞప్తి చేశారు.

రిపోర్టర్ : రాము, సరుబుజ్జి, ఆమదాలవలస, శ్రీకాకుళం జిల్లా.