మహిళా శక్తి భవనాలు ప్రారంభించేది ఎప్పుడు?

కొండాపూర్;మహిళా సంఘాల కోసం నిర్మించిన ద్వాక్రా భవనాలు ప్రారంభానికి నోచుకోకపోవడంతో మహిళలు ఎదురుచూస్తున్నారు. మహిళా సంఘాలకు సమావేశాలు నిర్వహించుకోవడంతో పాటు వివిధ కార్యక్రమాలకు ఉపయోగపడేలా నిర్మించిన భవనాలు పూర్తయి నెలలు గడుస్తున్నా  వినియోగంలోకి రాకపోవడం విమర్శలకు తావిస్తోంది.కొండాపూర్ మండలంలోని అన్ని గ్రామ పంచాయతీలకు ఉపాధి హామీ పథకం ద్వారా ఒక్కో భవనానికి రూ.10 లక్షల చొప్పున ద్వాక్రా భవనాలు మంజూరయ్యాయి. గత ఏడాది ప్రజాప్రతినిధులు శంకుస్థాపనలు చేయగా, పనులు ప్రారంభమయ్యాయి. ఇందులో పది భవనాలు పూర్తయి ప్రారంభానికి సిద్ధంగా ఉన్నాయి. మిగిలిన భవనాలు  త్వరలో పూర్తయ్యే దశలో ఉన్నాయని పంచాయతీరాజ్ ఏఈ శ్రీనివాస్ రెడ్డి తెలిపారు.ప్రారంభోత్సవం కోసం మహిళల ఎదురుచూపులు భవనాలు పూర్తయినా ప్రారంభించకపోవడంతో ద్వాక్రా మహిళలకు వాటి సేవలు అందడం లేదు. సమావేశాలు, సంఘాల కార్యకలాపాలు నిర్వహించుకునేందుకు సొంత వసతి కల్పించాలనే లక్ష్యంతో నిర్మించిన భవనాలు నిరుపయోగంగా ఉండటం మహిళలను నిరాశకు గురిచేస్తోంది.ప్రజాప్రతినిధులు, ఉన్నతాధికారులు స్పందించి పూర్తయిన పది ద్వాక్రా భవనాలను వెంటనే ప్రారంభించి మహిళా సంఘాలకు అందుబాటులోకి తీసుకురావాలని మహిళలు కోరుతున్నారు. మిగిలిన భవనాల పనులను  త్వరితగతిన పూర్తి చేసి అన్ని గ్రామాల్లో మహిళా శక్తి భవనాల సేవలు అందించాలని విజ్ఞప్తి చేస్తున్నారు.