మహాశక్తి దేవాలయంలో వైభవంగా లక్ష్మీ కుబేర హోమం

 సూర్య కరీంనగర్: దీపావళి పర్వదినాన్ని పురస్కరించుకొని కరీంనగర్‌లోని మహాశక్తి దేవాలయంలో లక్ష్మీ కుబేర హోమాన్ని భక్తిశ్రద్ధలతో, వైభవంగా నిర్వహించారు. ఈ సందర్భంగా అమ్మవార్లను శ్రీ మహాలక్ష్మి అవతారంలో వివిధ రకాల పుష్పాలు, ఆభరణాలతో విశేషంగా అలంకరించగా భక్తులకు కనులవిందుగా దర్శనమిచ్చారు.

దీపావళి వేడుకల్లో భాగంగా నిర్వహించిన ప్రత్యేక పూజలు, లక్ష్మీ కుబేర హోమంలో పలువురు భక్తులు పాల్గొని అమ్మవారి కృపాకటాక్షాలు పొందారు. ఈ సందర్భంగా కేంద్ర హోంశాఖ సహాయ మంత్రి బండి సంజయ్ కుమార్ మహాశక్తి దేవాలయాన్ని సందర్శించి విశేష అలంకరణలో ఉన్న అమ్మవార్లను దర్శించుకొని ప్రత్యేక పూజలు నిర్వహించారు. ఆలయ అర్చకులు ఆయనకు ఆశీర్వచనాలు అందజేశారు.