మానేరు వాగులో మునిగి యువకుడు మృతి

సూర్య, ముత్తారం ముత్తారం మండలం ఓడేడు గ్రామ శివారులోని మానేరు నది వద్ద ప్రమాదవశాత్తు నీటిలో మునిగి రత్నాపూర్ గ్రామానికి చెందిన శానిగరపు జయపాల్ (32) మృతి చెందినట్లు ఎస్ ఐ ఎన్.రవికుమార్ తెలిపారు. శుక్రవారం మధ్యాహ్నం సుమారు 12:30 గంటల సమయంలో జయపాల్ తన భార్య శ్రుతి, కుమార్తెతో కలిసి స్వగ్రామానికి తిరిగి వస్తుండగా మానేరు నది వద్ద ఆగారు. ఈ క్రమంలో జయపాల్ నీటిలోకి దిగడంతో ప్రమాదవశాత్తు మునిగిపోయాడు. అతడిని రక్షించేందుకు ప్రయత్నించిన భార్య శ్రుతి కూడా నీటిలో మునిగిపోతుండగా, అక్కడే ఉన్న ఈశ్వర్ వారిని బయటకు తీశాడు. అయితే అప్పటికే జయపాల్ మృతి చెందగా, అపస్మారక స్థితిలో ఉన్న శ్రుతిని మంథని ప్రభుత్వ ఆసుపత్రికి తరలించారు. ఈ మేరకు కేసు నమోదు చేసుకొని దర్యాప్తు చేస్తున్నట్లు ఎస్ ఐ తెలిపారు.