లింగంపల్లిలో వైభవంగా దుర్గామాత ఊరేగింపు, నిమజ్జనం

నవాబుపేట, మేజర్ న్యూస్: వికారాబాద్ జిల్లా నవాబుపేట మండల పరిధిలోని లింగంపల్లి గ్రామంలో దుర్గామాత ఊరేగింపు, నిమజ్జన కార్యక్రమాన్ని భక్తిశ్రద్ధలతో అంగరంగ వైభవంగా నిర్వహించారు. నవరాత్రి ఉత్సవాల్లో భాగంగా అమ్మవారికి ప్రత్యేక పూజలు నిర్వహించిన భక్తులు, అనంతరం నిర్వహించిన శోభాయాత్రలో పెద్ద సంఖ్యలో పాల్గొన్నారు. మహిళలు కోలాటాలతో సందడి చేయగా, భక్తుల జై దుర్గామాత నినాదాలు, మంగళ వాయిద్యాల నడుమ ఊరేగింపు ఉత్సాహంగా సాగింది. మహిళల కోలాట ప్రదర్శనలు వేడుకలకు ప్రత్యేక ఆకర్షణగా నిలిచాయి. గ్రామమంతా పండుగ వాతావరణం నెలకొనగా, భక్తులు భక్తిపారవశ్యంతో అమ్మవారికి వీడ్కోలు పలికారు. అనంతరం సంప్రదాయబద్ధంగా దుర్గామాత విగ్రహ నిమజ్జన కార్యక్రమాన్ని నిర్వహించారు. గ్రామ సర్పంచ్ వడ్ల శోభ పరమేశ్వర్ ఆధ్వర్యంలో జరిగిన ఈ వేడుకల్లో వార్డు సభ్యులు, కాంగ్రెస్, బీఆర్ఎస్, బీజేపీ పార్టీల నాయకులు, కార్యకర్తలు, మహిళలు, యువకులు, గ్రామస్తులు, భక్తులు తదితరులు పాల్గొన్నారు. వివిధ పార్టీల నాయకులు, గ్రామ ప్రజలు కలిసికట్టుగా వేడుకల్లో పాల్గొనడం గ్రామ ఐక్యతకు నిదర్శనంగా నిలిచింది.

రిపోర్టర్: ఎం.వెంకటేష్, నవాబు పేట్, వికారాబాద్ జిల్లా.