telangana
కోర్టుకు హాజరైన సీఎం రేవంత్ రెడ్డి
హైదరాబాద్: తెలంగాణ ముఖ్యమంత్రి ఎనుముల రేవంత్ రెడ్డి నేడు నాంపల్లిలోని ప్రత్యేక ప్రజాప్రతినిధుల కోర్టుకు హాజరయ్యారు. 2021లో జరిగిన నాగార్జునసాగర్ శాసనసభ ఉప ఎన్నికల ప్రచార సమయంలో కరోనా నిబంధనలను ఉల్లంఘించారన్న అభియోగంపై ఆయనపై అప్పట్లో కేసు నమోదైంది. ఈ కేసు విచారణలో భాగంగా కోర్టు ఆదేశాల మేరకు సీఎం రేవంత్ రెడ్డి న్యాయస్థానం ఎదుట వ్యక్తిగతంగా హాజరయ్యారు.
అప్పట్లో కోవిడ్-19 ఆంక్షలు అమల్లో ఉన్నప్పటికీ అనుమతి లేకుండా పెద్ద ఎత్తున జనసమీకరణ చేసి ప్రచారం నిర్వహించారని పేర్కొంటూ పోలీసులు ఈ కేసును నమోదు చేశారు. కాగా, ముఖ్యమంత్రి రాక నేపథ్యంలో నాంపల్లి కోర్టు ప్రాంగణం వద్ద పోలీసులు కట్టుదిట్టమైన భద్రతా ఏర్పాట్లు చేశారు. కోర్టు పరిసరాల్లో సాధారణ రాకపోకలకు అంతరాయం కలగకుండా ట్రాఫిక్ ఆంక్షలు విధించారు. విచారణ అనంతరం న్యాయస్థానం తదుపరి వాయిదాను ఖరారు చేసింది.
