ముఖ్యమంత్రి పర్యటనకు ఏర్పాట్లు పూర్తి చేయాలి జిల్లా కలెక్టర్ హైమావతి.

సిద్దిపేట  ; ఈనెల 19వ తేదీన రాష్ట్ర ముఖ్యమంత్రి ఏ. రేవంత్ రెడ్డి పాల్గొననున్న భారీ బహిరంగ సభను విజయవంతంగా నిర్వహించేందుకు పకడ్బందీ ఏర్పాట్లు చేయాలని జిల్లా కలెక్టర్ కె. హైమావతి సంబంధిత శాఖల అధికారులను ఆదేశించారు.గురువారం సిద్దిపేట జిల్లా కేంద్రంలోని నాగదేవత గుడి నుంచి సిరిసిల్లకు వెళ్లే బైపాస్ రోడ్డు వెంబడి సుమారు 15 ఎకరాల విస్తీర్ణంలో ఏర్పాటు చేస్తున్న బహిరంగ సభ ప్రాంగణాన్ని కలెక్టర్ క్షేత్రస్థాయిలో పరిశీలించారు. సభా వేదికతో పాటు వివిధ విభాగాల ఏర్పాట్ల పురోగతిని అధికారులను అడిగి తెలుసుకున్నారు.ఈ సందర్భంగా కలెక్టర్ మాట్లాడుతూ.. సభకు హాజరయ్యే ప్రజలకు ఎలాంటి ఇబ్బందులు కలగకుండా అన్ని శాఖల అధికారులు సమన్వయంతో పనిచేయాలని సూచించారు. వీఐపీలు, ప్రజాప్రతినిధులు, అధికారులు, ప్రజలు, మీడియా ప్రతినిధుల కోసం ప్రత్యేక ఏర్పాట్లు చేయాలని ఆదేశించారు.వాహనాల పార్కింగ్, ట్రాఫిక్ నియంత్రణ, పోలీసు బందోబస్తు, ప్రజల రాకపోకలకు సంబంధించి ముందస్తు ప్రణాళిక రూపొందించాలని స్పష్టం చేశారు. ప్రత్యేక గ్యాలరీలు, బారికేడింగ్ ఏర్పాటు చేయడంతో పాటు విద్యుత్ సరఫరాలో ఎలాంటి అంతరాయం కలగకుండా అవసరమైన ముందస్తు చర్యలు తీసుకోవాలని సంబంధిత అధికారులకు సూచించారు.సభకు పెద్ద సంఖ్యలో ప్రజలు హాజరయ్యే అవకాశం ఉన్నందున తాగునీరు, పారిశుద్ధ్యం, భద్రత, ఇతర మౌలిక సదుపాయాల కల్పనపై ప్రత్యేక దృష్టి సారించాలని కలెక్టర్ ఆదేశించారు.ఈ పరిశీలనలో సిద్దిపేట ఆర్డీవో సదానందం, తహసీల్దార్ కిరణ్, పోలీస్ శాఖ అధికారులు, రెవెన్యూ, ఆర్ అండ్ బి, విద్యుత్ తదితర శాఖల అధికారులు పాల్గొన్నారు.