కళాశాలల సమీపంలో మద్యం విక్రయాలు!

ఫుడ్‌ కోర్టు ముసుగులో బెల్ట్‌ షాపు నిర్వహణ? కేసులు నమోదైనా మారని తీరు.. అధికారుల తీరుపై స్థానికుల అనుమానాలు

శంకర్‌పల్లి, మేజర్ న్యూస్ (నవంబర్ 2):  విద్యాసంస్థల సమీపంలో మద్యం విక్రయాలు సాగుతున్నా సంబంధిత అధికారులు పట్టించుకోవడం లేదనే ఆరోపణలు వినిపిస్తున్నాయి. శంకర్‌పల్లి పరిధిలోని మొకిల గ్రామంలో ఉన్న కె.కె. ఫుడ్‌ కోర్టులో నిబంధనలకు విరుద్ధంగా మద్యం విక్రయాలు జరుగుతున్నాయని స్థానికులు ఆందోళన వ్యక్తం చేస్తున్నారు. ఫుడ్‌ కోర్టు పేరుతో మద్యం విక్రయాలు సాగిస్తున్నారని, గతంలో పలుమార్లు కేసులు నమోదైనప్పటికీ తిరిగి కార్యకలాపాలు ప్రారంభిస్తున్నారని వారు ఆరోపిస్తున్నారు.

కేసులు నమోదైనా మారని తీరు

కె.కె. ఫుడ్‌ కోర్టులో మద్యం విక్రయాలపై గతంలో పలుమార్లు కేసులు నమోదైనట్లు స్థానికులు చెబుతున్నారు. అయినప్పటికీ కొద్దిరోజులకే తిరిగి విక్రయాలు ప్రారంభిస్తుండటంపై అనుమానాలు వ్యక్తం చేస్తున్నారు. నిబంధనలకు విరుద్ధంగా వ్యవహరిస్తున్న నిర్వాహకులపై సంబంధిత అధికారులు ఎందుకు కఠిన చర్యలు తీసుకోవడం లేదని ప్రశ్నిస్తున్నారు. అధికారుల నిర్లక్ష్యంపై, అవినీతి ఆరోపణలపై ఉన్నతాధికారులు సమగ్ర విచారణ జరిపించాలని డిమాండ్ చేస్తున్నారు.

ప్రశ్నిస్తే దురుసు సమాధానాలు?

ఫుడ్‌ కోర్టులో మద్యం విక్రయాలపై స్థానికులు ప్రశ్నించగా, నిర్వాహకులు, సిబ్బంది దురుసుగా ప్రవర్తిస్తున్నారని ఆరోపణలు వస్తున్నాయి. ఎన్ని కేసులు నమోదైనా కొద్దిరోజుల్లోనే తిరిగి ప్రారంభిస్తామని, తమకు పలువురి అండ ఉందని చెబుతున్నట్లు స్థానికులు పేర్కొంటున్నారు. ఈ వ్యవహారంపై అధికారులు స్పందించి వాస్తవాలను వెలుగులోకి తీసుకురావాలని కోరుతున్నారు.

విద్యార్థుల భవిష్యత్తుపై ఆందోళన

కళాశాలలు, విద్యాసంస్థలకు సమీపంలో మద్యం విక్రయాలు కొనసాగితే విద్యార్థులు ఆకర్షితులయ్యే ప్రమాదం ఉందని స్థానికులు ఆందోళన వ్యక్తం చేస్తున్నారు. మద్యం సేవించి వచ్చే వ్యక్తుల కారణంగా పరిసర ప్రాంతాల్లో ఇబ్బందులు ఎదురవుతున్నాయని చెబుతున్నారు. విద్యార్థుల భవిష్యత్తును దృష్టిలో ఉంచుకొని సంబంధిత శాఖల అధికారులు తక్షణమే స్పందించాలని కోరుతున్నారు.

ఉన్నతాధికారులు స్పందించేనా?

కె.కె. ఫుడ్‌ కోర్టులో మద్యం విక్రయాలకు సంబంధించి ఉన్న అనుమతులు, నిబంధనల అమలుపై సమగ్ర విచారణ చేపట్టాలని స్థానికులు డిమాండ్ చేస్తున్నారు. నిబంధనల ఉల్లంఘన జరిగినట్లు తేలితే బాధ్యులపై చట్టపరమైన చర్యలు తీసుకోవాలని, అవసరమైతే అనుమతులు రద్దు చేసి విక్రయాలను నిలిపివేయాలని కోరుతున్నారు. అధికారుల తీరుపై వస్తున్న ఆరోపణలపైనా విచారణ జరిపి, విద్యాసంస్థల సమీపంలో అక్రమ మద్యం విక్రయాలకు శాశ్వతంగా అడ్డుకట్ట వేయాలని విజ్ఞప్తి చేస్తున్నారు.