జనగణన పక్కాగా చేపట్టాలి!
మార్గదర్శకాలను తప్పనిసరిగా పాటించాలి
అధికారులకు శిక్షణలో కలెక్టర్‌ సి. నారాయణ రెడ్డి దిశానిర్దేశం
రంగారెడ్డి : జిల్లాలో ఫేజ్ -2 జనగణనను ఖచ్చితత్వంతో, క్రమబద్ధంగా చేపట్టి నిర్ణీత గడువులో పూర్తి చేయాలని రంగారెడ్డి జిల్లా కలెక్టర్‌ అధికారులకు సూచించారు. జనగణన కార్యక్రమాన్ని సమర్థంగా నిర్వహించేందుకు ఏర్పాటు చేసిన రెండు రోజుల శిక్షణ గురువారం ప్రారంభమైంది. ఈ సందర్భంగా కలెక్టర్‌ మాట్లాడుతూ అధికారులు మార్గదర్శకాలను తప్పనిసరిగా పాటించాలని స్పష్టం చేశారు. తమ పరిధిలో గణన సజావుగా సాగేందుకు పర్యవేక్షణ చేపట్టాలని, సంబంధిత శాఖలు సమన్వయంతో పనిచేయాలని సూచించారు.
శిక్షణలో జనగణన విధివిధానాలు, అధికారుల బాధ్యతలు, శాఖల మధ్య సమన్వయం తదితర అంశాలపై అవగాహన కల్పించారు. గణనలో ఖచ్చితత్వం పాటించడం, నిర్ణీత సమయంలో ప్రక్రియను పూర్తి చేయాల్సిన అవసరాన్ని వివరించారు. శుక్రవారం కూడా శిక్షణ కొనసాగనుంది. కార్యక్రమంలో అదనపు కలెక్టర్లు, రంగారెడ్డి, మేడ్చల్‌–మల్కాజిగిరి జిల్లాల రెవెన్యూ అధికారులు, ఆర్డీవోలు, తహసీల్దార్లు, మున్సిపల్‌ కమిషనర్లు, ఎంపీడీవోలు పాల్గొన్నారు.
రంగారెడ్డి, మేజర్ న్యూస్ (అక్టోబర్ 22)
