ఇమాంపూర్ గ్రామంలో భారీ వాహనాల బీభత్సం

తూప్రాన్; ; తూప్రాన్ మండలం ఇమాంపూర్ గ్రామంలో భారీ వాహనాల రాకపోకలు గ్రామస్తులకు తీవ్ర ఇబ్బందులను కలిగిస్తున్నాయి. గ్రామంలోని ప్రధాన రహదారిపై నిరంతరం భారీ వాహనాలు రాకపోకలు సాగిస్తుండటంతో ప్రజలు నిత్యం ట్రాఫిక్ సమస్యతో సతమతమవుతున్నారు. కనీసం గ్రామంలోని ఒక వైపు నుంచి మరో వైపుకు రోడ్డు దాటాలన్నా గంటల తరబడి వేచి ఉండాల్సిన పరిస్థితి నెలకొందని గ్రామస్తులు ఆవేదన వ్యక్తం చేస్తున్నారు.
ముఖ్యంగా శనివారం మధ్యాహ్నం నుంచి సాయంత్రం వరకు భారీ వాహనాల రాకపోకల కారణంగా గ్రామంలో సుమారు నాలుగు గంటల పాటు తీవ్ర ట్రాఫిక్ అంతరాయం ఏర్పడింది. దీంతో ఎక్కడి వాహనాలు అక్కడే నిలిచిపోయాయి. గ్రామంలోకి వెళ్లే, గ్రామం నుంచి బయటకు వచ్చే దారులు వాహనాలతో కిక్కిరిసిపోయాయి. ద్విచక్ర వాహనదారులు, ఆటోలు, కార్లతో పాటు నిత్యావసర పనుల నిమిత్తం వెళ్లే ప్రజలు తీవ్ర ఇబ్బందులు ఎదుర్కొన్నారు. అత్యవసర పనులపై వెళ్లాల్సిన వారు సైతం గంటల తరబడి ట్రాఫిక్‌లో చిక్కుకుపోయి అవస్థలు పడాల్సి వచ్చింది. టోల్‌గేట్ ఫీజులు తప్పించుకునేందుకే ప్రత్యామ్నాయ మార్గమా? టోల్‌గేట్ వద్ద నిర్ణీత రుసుములు చెల్లించకుండా ఉండేందుకు కొన్ని చిన్న, పెద్ద వాహనాలు ప్రత్యామ్నాయ మార్గంగా అల్లాపూర్ నుంచి ఇమాంపూర్ మీదుగా రాకపోకలు సాగిస్తున్నాయని గ్రామస్తులు ఆరోపిస్తున్నారు. ముఖ్యంగా భారీ వాహనాలు గ్రామంలోని ఇరుకైన రహదారుల గుండా ప్రయాణిస్తుండటంతో స్థానికులకు రాకపోకలు కష్టతరంగా మారుతున్నాయని పేర్కొంటున్నారు. టోల్‌గేట్ ఫీజులు ఆదా చేసుకునే ప్రయత్నంలో గ్రామ ప్రజలను ఇబ్బందులకు గురిచేయడం ఎంతవరకు సమంజసమని ప్రశ్నిస్తున్నారు.
అధికారుల పర్యవేక్షణ ఏదీ?
గ్రామంలో భారీ వాహనాల రాకపోకలతో ఇంతటి సమస్య ఏర్పడుతున్నప్పటికీ రవాణా శాఖ, పోలీసు యంత్రాంగం తగిన స్థాయిలో స్పందించడం లేదని గ్రామస్తులు అసంతృప్తి వ్యక్తం చేస్తున్నారు. గ్రామీణ రహదారుల సామర్థ్యాన్ని, ప్రజల భద్రతను పరిగణనలోకి తీసుకోకుండా భారీ వాహనాలు యథేచ్ఛగా తిరుగుతుండటం ప్రమాదాలకు దారితీసే అవకాశం ఉందని ఆందోళన చెందుతున్నారు. భారీ వాహనాల రాకపోకల వల్ల చిన్నపిల్లలు, వృద్ధులు, మహిళలు, పాఠశాలలకు వెళ్లే విద్యార్థులు, ద్విచక్ర వాహనదారులు తీవ్ర ఇబ్బందులు ఎదుర్కొంటున్నారని తెలిపారు. ఏదైనా అత్యవసర పరిస్థితి ఏర్పడితే అంబులెన్స్ వంటి అత్యవసర సేవల వాహనాలు కూడా గ్రామంలోకి వెళ్లేందుకు, బయటకు వచ్చేందుకు ఇబ్బందులు ఎదుర్కొనే ప్రమాదం ఉందని ఆందోళన వ్యక్తం చేస్తున్నారు.
అల్లాపూర్ నుంచి ఇమాంపూర్ వరకు భారీ వాహనాల నియంత్రణకు చర్యలు చేపట్టాలిఈ సమస్యపై జిల్లా ఉన్నతాధికారులు, రవాణా శాఖ అధికారులు, పోలీసు అధికారులు తక్షణమే స్పందించాలని గ్రామస్తులు కోరుతున్నారు. అల్లాపూర్ నుంచి ఇమాంపూర్ గ్రామం మీదుగా భారీ వాహనాలు రాకపోకలు సాగించకుండా తగిన ప్రత్యామ్నాయ ఏర్పాట్లు చేయాలని, అవసరమైన చోట నిషేధ సూచిక బోర్డులు ఏర్పాటు చేయడంతో పాటు పోలీసు సిబ్బందితో నిరంతర పర్యవేక్షణ చేపట్టాలని డిమాండ్ చేస్తున్నారు.
అలాగే టోల్‌గేట్ ఫీజులు తప్పించుకునేందుకు ప్రత్యామ్నాయ మార్గాలను వినియోగిస్తున్న వాహనాలపై సంబంధిత అధికారులు విచారణ జరిపి, నిబంధనల ప్రకారం చర్యలు తీసుకోవాలని కోరుతున్నారు. గ్రామ ప్రజల రాకపోకలకు ఆటంకం కలగకుండా భారీ వాహనాల ప్రయాణానికి స్పష్టమైన నియంత్రణ విధించాలని విజ్ఞప్తి చేస్తున్నారు.ఇప్పటికైనా అధికారులు స్పందించి ఇమాంపూర్ గ్రామానికి ట్రాఫిక్ కష్టాల నుంచి విముక్తి కల్పిస్తారా? లేక గ్రామస్తులు ఇలాగే ప్రతిరోజూ గంటల తరబడి రహదారులపైనే నిరీక్షించాల్సిన పరిస్థితి కొనసాగుతుందా? అని గ్రామ ప్రజలు ప్రశ్నిస్తున్నారు.