హకింపేట్ ఎడ్యుకేషనల్ హబ్‌లో వలస కూలీల కన్నీటి గోడు.. కూలి డబ్బుల కోసం ఆందోళన

దుద్యాల, మేజర్ న్యూస్: ముఖ్యమంత్రి రేవంత్ రెడ్డి ప్రాతినిధ్యం వహిస్తున్న కొడంగల్ నియోజకవర్గంలో వలస కూలీలు కూలి డబ్బుల కోసం ఆందోళనకు దిగారు. దుద్యాల మండలం పోలేపల్లిలో నిర్మిస్తున్న ఎడ్యుకేషనల్ హబ్ పనుల్లో పనిచేస్తున్న వలస కూలీలు తమకు రావాల్సిన కూలి డబ్బులను KLSR కన్‌స్ట్రక్షన్స్ సంస్థ చెల్లించడం లేదంటూ నిరసన వ్యక్తం చేశారు.రాత్రింబవళ్లు కష్టపడి పనిచేస్తున్నా తమ శ్రమకు తగిన ప్రతిఫలం అందడం లేదని కూలీలు ఆవేదన వ్యక్తం చేశారు. దీపావళి పండుగ సమీపిస్తున్న తరుణంలో తమ కుటుంబాలకు డబ్బులు ఎలా పంపించాలని ప్రశ్నించారు. స్వగ్రామాల్లో ఉన్న కుటుంబ సభ్యులు పండుగ కోసం ఎదురుచూస్తుంటే, ఇక్కడ తమకు కూలి డబ్బులు అందక తీవ్ర ఇబ్బందులు ఎదుర్కొంటున్నామని కన్నీటిపర్యంతమయ్యారు.ముఖ్యమంత్రి రేవంత్ రెడ్డి కొడంగల్ పర్యటన నేపథ్యంలో తమ సమస్యను ఆయన దృష్టికి తీసుకెళ్లి న్యాయం చేయాలని కోరుతామని వలస కూలీలు తెలిపారు. ఇప్పటికైనా సంబంధిత కాంట్రాక్ట్ సంస్థ స్పందించి తమకు రావాల్సిన కూలి డబ్బులను వెంటనే చెల్లించాలని వారు డిమాండ్ చేశారు.