వేణుగోపాల్ ధూత్‌ను బ్యాంక్రప్ట్‌గా ప్రకటించిన ఎన్‌సీఎల్‌టీ
సూర్య కార్పొరేట్ డెస్క్, ముంబై: ప్రముఖ ఎలక్ట్రానిక్స్ మరియు టెలికాం ఉత్పత్తుల సంస్థ వీడియోకాన్ ఇండస్ట్రీస్ మాజీ ప్రమోటర్ వేణుగోపాల్ నంద్‌లాల్ ధూత్‌కు జాతీయ కంపెనీ లా ట్రిబ్యునల్ ముంబై బెంచ్ భారీ షాక్ ఇచ్చింది. స్టేట్ బ్యాంక్ ఆఫ్ ఇండియా నేతృత్వంలోని బ్యాంకుల కన్సార్టియంకు చెల్లించాల్సిన ₹12,668 కోట్ల భారీ మొండి బకాయిల రికవరీ కేసులో ఆయనను దివాలాదారుడిగా ప్రకటిస్తూ ట్రిబ్యునల్ చారిత్రాత్మక తీర్పును వెలువరించింది. కంపెనీల రుణాలకు వ్యక్తిగత పూచీకత్తు ఇచ్చిన కార్పొరేట్ ప్రమోటర్లపై కఠిన చర్యలు తీసుకునే ప్రక్రియలో ఇన్సాల్వెన్సీ అండ్ బ్యాంక్రప్టసీ కోడ్ సెక్షన్ 126 కింద న్యాయమూర్తులు వినయ్ గోయల్, చరణ్‌జీత్ సింగ్ గులాటీలతో కూడిన ధర్మాసనం ఈ కీలక ఉత్తర్వులను జారీ చేసింది.
₹600 కోట్ల రీపేమెంట్ ప్లాన్‌ను తిరస్కరించిన బ్యాంకులు
వీడియోకాన్ ఇండస్ట్రీస్, వీడియోకాన్ టెలికమ్యూనికేషన్స్ లిమిటెడ్ తీసుకున్న భారీ రుణాలకు వేణుగోపాల్ ధూత్ వ్యక్తిగత గ్యారంటీలు సమర్పించారు. అయితే ఆయా రుణాలు మొండి బకాయిలుగా మారడంతో ఎస్‌బీఐ దాఖలు చేసిన పిటిషన్ ఆధారంగా ధూత్‌పై వ్యక్తిగత దివాలా పరిష్కార ప్రక్రియను ఎన్‌సీఎల్‌టీ ప్రారంభించింది. ఈ క్రమంలో ₹12,668 కోట్ల మొత్తం డిఫాల్ట్ క్లెయిమ్‌లకు వ్యతిరేకంగా, రియల్ ఎస్టేట్ ప్రాజెక్టు ద్వారా ₹600 కోట్లను తిరిగి చెల్లిస్తానంటూ ధూత్ సమర్పించిన రీపేమెంట్ ప్రణాళికను రుణదాతల కమిటీ పూర్తిగా తిరస్కరించింది. ఆ ప్రతిపాదన భవిష్యత్ నగదు ప్రవాహాలు, అస్పష్టమైన నిబంధనలపై ఆధారపడి ఉందని బ్యాంకులు స్పష్టం చేయడంతో రిజల్యూషన్ ప్రక్రియ విఫలమైంది.
ఆస్తులన్నీ ట్రస్టీ ఆధీనంలోకి.. వారం రోజుల్లో సమగ్ర నివేదిక
బ్యాంకుల విజ్ఞప్తి మేరకు ఎన్‌సీఎల్‌టీ ఆయన్ను దివాలాదారుడిగా నిర్ధారిస్తూ, ఆయన వ్యక్తిగత ఆస్తులు, ఎస్టేట్‌ను అధికారిక బ్యాంక్రప్టసీ ట్రస్టీ ఆధీనంలోకి బదిలీ చేయాలని ఆదేశించింది. తన పూర్తి ఆర్థిక పరిస్థితి, చర స్థిర ఆస్తులు, రుణాల వివరాలను రాబోయే ఏడు రోజుల్లోపు ట్రస్టీకి సమర్పించాలని ధూత్‌ను ఆదేశించింది. అలాగే బ్యాంక్రప్టసీ ట్రస్టీ బహిరంగ నోటీసు జారీ చేసి ఇతర రుణదాతల క్లెయిమ్‌లను స్వీకరించాలని, 90 రోజుల్లోగా ప్రాథమిక నివేదికను ట్రిబ్యునల్‌కు సమర్పించాలని ఆదేశాల్లో పేర్కొంది. కార్పొరేట్ రుణాలకు హామీదారులుగా ఉండి తప్పించుకోవాలని చూసే భారీ పారిశ్రామికవేత్తలకు ఈ తీర్పు బలమైన హెచ్చరికగా నిలిచిందని బ్యాంకింగ్ రంగ నిపుణులు విశ్లేషిస్తున్నారు.
