పెదవోగిరాలలో టీడీపీ కార్యకర్తలపై దాడి.. వైసీపీపై మాజీ ఎమ్మెల్సీ రాజేంద్రప్రసాద్ ఆగ్రహం

ఉయ్యూరు రూరల్, మేజర్ న్యూస్: జడ్పీటీసీ, ఎంపీటీసీ ఎన్నికల పోలింగ్ సందర్భంగా ఉయ్యూరు రూరల్ మండలం పెదవోగిరాల గ్రామంలో టీడీపీ కార్యకర్తలపై దాడి ఘటనను మాజీ ఎమ్మెల్సీ వైవీబీ రాజేంద్రప్రసాద్ తీవ్రంగా ఖండించారు. గ్రామానికి వెళ్లి పరిస్థితులను సమీక్షించి, బాధిత కార్యకర్తలు, పార్టీ నాయకులతో మాట్లాడి ధైర్యం చెప్పారు. అనంతరం ఉయ్యూరు ప్రభుత్వ ఆసుపత్రిలో చికిత్స పొందుతున్న బాధితుడు ఏసుబాబును పరామర్శించారు. ఈ సందర్భంగా రాజేంద్రప్రసాద్ మాట్లాడుతూ.. ఇటీవల జరిగిన కార్పొరేషన్లు, మున్సిపాలిటీలు, నగర పంచాయతీల ఎన్నికల ఫలితాల నేపథ్యంలో వైసీపీ నాయకులు ఓటమి భయంతో గ్రామాల్లో గొడవలు సృష్టిస్తున్నారని ఆరోపించారు. పోలింగ్ కేంద్రాల వద్ద ప్రశాంతంగా ఉన్న టీడీపీ నాయకులు, కార్యకర్తలపై దాడులకు దిగడం దారుణమన్నారు. పెదవోగిరాలలో టీడీపీ కార్యకర్తలపై దాడి చేసి గాయపరచడాన్ని తీవ్రంగా ఖండిస్తున్నామని, ఘటనకు బాధ్యులైన వారిపై కఠిన చర్యలు తీసుకోవాలని పోలీసులను డిమాండ్ చేశారు. ఈ కార్యక్రమంలో టీడీపీ, జనసేన పార్టీల నాయకులు, కార్యకర్తలు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, పెనమలూరు నియోజకవర్గం, కృష్ణాజిల్లా.