రేణుక ఎల్లమ్మ దేవాలయంలో మేయర్ రమేష్ గౌడ్ ప్రత్యేక పూజలు

అనంతపురం బ్యూరో మేజర్ న్యూస్ : అనంతపురం నగర శివారులోని రాయల్ నగర్‌లో ఉన్న శ్రీ రేణుక ఎల్లమ్మ దేవాలయాన్ని అనంతపురం నగరపాలక సంస్థ మేయర్ చిట్లూరు రమేష్ గౌడ్ సందర్శించారు. అమ్మవారికి ప్రత్యేక పూజలు, అర్చనలు నిర్వహించి నగర ప్రజల సంక్షేమం, తన పాలనా బాధ్యతల కోసం దైవాన్ని ప్రార్థించారు.

ఈ సందర్భంగా ఆలయ పూజారులు వేద మంత్రోచ్చారణలతో పూజలు నిర్వహించి మేయర్ రమేష్ గౌడ్‌కు తీర్థ ప్రసాదాలు అందజేశారు. అమ్మవారి ఆశీస్సులతో నగరంలో అన్ని వర్గాల ప్రజల కోసం పనిచేసేందుకు సంకల్పించానని ఆయన తెలిపారు.

ఆలయ దర్శనం అనంతరం మేయర్ రమేష్ గౌడ్ ఈడిగ గౌడ సంఘం నాయకులు, సభ్యులతో సమావేశమయ్యారు. ఈ సందర్భంగా నగర అభివృద్ధి, స్థానిక సమస్యలు, సామాజిక సంక్షేమం వంటి అంశాలపై విస్తృతంగా చర్చించారు.

గౌడ సంఘం నాయకులు మేయర్‌గా రమేష్ గౌడ్ విజయానికి అభినందనలు తెలిపారు. నగరంలోని అన్ని ప్రాంతాల అభివృద్ధికి ప్రాధాన్యం ఇవ్వాలని, ప్రజల సమస్యలను త్వరగా పరిష్కరించాలని వారు కోరారు.  

రిపోర్టర్ : మొయిలుద్దీన్ అనంతపురం బ్యూరో మేజర్ న్యూస్.