గురుకుల ఉపాధ్యాయుల సమస్యలు పరిష్కరించాలి - టి ఎస్ యు టి ఎఫ్

సూర్య,కాగజ్‌నగర్:  తెలంగాణ రాష్ట్రంలోని గురుకుల ఉపాధ్యాయులు ఎదుర్కొంటున్న సమస్యలను ప్రభుత్వం వెంటనే పరిష్కరించాలని తెలంగాణ రాష్ట్ర ఐక్య ఉపాధ్యాయ ఫెడరేషన్ (టీఎస్‌యూటీఎఫ్‌) కొమురం భీం ఆసిఫాబాద్ జిల్లా అధ్యక్షురాలు వైద్య శాంతికుమారి డిమాండ్ చేశారు. సోమవారం కాగజ్‌నగర్‌లోని మైనారిటీ బాలుర గురుకుల పాఠశాలను సందర్శించి ఉపాధ్యాయులతో  ఆమె మాట్లాడుతూ కాంట్రాక్టు, అవుట్‌సోర్సింగ్, అతిథి ఉపాధ్యాయులకు కనీస వేతన స్కేలు అమలు చేయడంతో పాటు సమాన పనికి సమాన వేతనం ఇవ్వాలన్నారు. గురుకుల ఉపాధ్యాయులకు ఆరోగ్య కార్డులు అందించాలని, మైనారిటీ గురుకులాల్లో ఉపాధ్యాయులపై అడ్మిషన్ల ఒత్తిడిని తగ్గించాలని కోరారు. పాత పెన్షన్ విధానాన్ని పునరుద్ధరించి, సీపీఎస్‌ను రద్దు చేయాలని డిమాండ్ చేశారు.ఉపాధ్యాయులకు రావాల్సిన డీఏలు, పీఆర్సీని వెంటనే మంజూరు చేయడంతో పాటు పెండింగ్ బకాయిలను చెల్లించాలన్నారు. గురుకులాలు, కేజీబీవీలు, మోడల్ పాఠశాలల్లో కేర్‌టేకర్లను నియమించి ఉపాధ్యాయులను బోధనేతర పనుల నుంచి విముక్తి కల్పించాలని సూచించారు. ప్రతి గురుకులానికి ఇద్దరు ఆరోగ్య అధికారులను నియమించి విద్యార్థుల ఆరోగ్యంపై ప్రత్యేక శ్రద్ధ తీసుకోవాలని ప్రభుత్వాన్ని కోరారు.ఈ కార్యక్రమంలో టీఎస్‌యూటీఎఫ్‌ జిల్లా కార్యదర్శి జె. మహిపాల్, కాగజ్‌నగర్ మండల ప్రధాన కార్యదర్శి పి. మహేష్ పాల్గొన్నారు.