అజేష్ గెలిస్తే త్రిబుల్ ఇంజన్ సర్కార్‌తో సమగ్ర అభివృద్ధి.. సినీనటుడు, బీజేపీ నేత సాయికుమార్ పిలుపు
అనంతపురం ప్రతినిధి మేజర్ న్యూస్ :- అనంతపురం నగరంలో బీజేపీ మేయర్ అభ్యర్థి అజేష్‌ను గెలిపిస్తే త్రిబుల్ ఇంజన్ సర్కార్‌తో అభివృద్ధి వేగవంతమవుతుందని సినీనటుడు, బీజేపీ సీనియర్ నాయకుడు సాయికుమార్ అన్నారు. సోమవారం ఉదయం అర్బన్ టీడీపీ కార్యాలయానికి వచ్చిన ఆయనకు ఎమ్మెల్యే దగ్గుపాటి ప్రసాద్, ఎమ్మెల్సీ దళవాయి రమాదేవి, కూటమి నాయకులు ఘన స్వాగతం పలికారు. అనంతరం మంత్రి సత్యకుమార్, ఎమ్మెల్యే దగ్గుపాటితో కలిసి క్లస్టర్ ఇన్‌చార్జ్‌లు, నాయకులతో ఎన్నికల వ్యూహాలపై చర్చించారు.
ఈ సందర్భంగా సాయికుమార్ మాట్లాడుతూ అనంతపురం జిల్లాతో తనకు ఎంతోకాలంగా అనుబంధం ఉందన్నారు. కేంద్రం, రాష్ట్రంలో కూటమి పాలనలో అభివృద్ధి, సంక్షేమ కార్యక్రమాలు కొనసాగుతున్నాయని పేర్కొన్నారు. నగరంలోనూ అభివృద్ధి మరింత వేగవంతం కావాలంటే అజేష్‌తో పాటు 62 డివిజన్ల కూటమి అభ్యర్థులను భారీ మెజారిటీతో గెలిపించాలని కోరారు. నాయకులు ఏమిస్తారన్నది కాకుండా ఏం చేస్తారో ప్రజలు ప్రశ్నించాలని పిలుపునిచ్చారు.
ఎమ్మెల్యే దగ్గుపాటి ప్రసాద్ మాట్లాడుతూ గత ఐదేళ్ల వైసీపీ పాలనలో జరిగిన విధ్వంసాన్ని, కూటమి రెండేళ్ల పాలనలో జరిగిన అభివృద్ధిని బేరీజు వేసుకుని ప్రజలు ఓటు వేయాలన్నారు. అజేష్ గెలిస్తే నగర అభివృద్ధికి కేంద్రం నుంచి మరింత ప్రాధాన్యం లభిస్తుందని పేర్కొన్నారు. అనంతపురం సమగ్ర అభివృద్ధి కోసం మేయర్ అభ్యర్థితో పాటు 62 డివిజన్ల కూటమి అభ్యర్థులందరినీ గెలిపించాలని కోరారు.
