చదువుతోపాటు క్రీడల్లోనూ రాణించాలి

కమలాపూర్, మేజర్ న్యూస్. విద్యార్థినులు చదువుతోపాటు క్రీడల్లోనూ రాణించాలని హనుమకొండ జిల్లా అదనపు కలెక్టర్ ఎన్. రవి అన్నారు. బుధవారం హనుమకొండ జిల్లా కమలాపూర్ లోని మహాత్మా జ్యోతిబా పూలే వెనుకబడిన తరగతుల సంక్షేమ బాలికల గురుకుల పాఠశాల, కళాశాలలో   మహాత్మా జ్యోతిబా పూలే సంక్షేమ పాఠశాలలు,  కళాశాలల జిల్లాస్థాయి వార్షిక క్రీడా పోటీలు అండర్ -14, 17, 19 బాలికల విభాగానికి సంబంధించి పోటీలు ప్రారంభమయ్యాయి. క్రీడా పోటీల ప్రారంభోత్సవానికి హనుమకొండ జిల్లా అదనపు కలెక్టర్ ముఖ్య అతిథిగా హాజరై క్రీడాజ్యోతిని వెలిగించి  పోటీలను లాంఛనంగా ప్రారంభించారు. వివిధ క్రీడాంశాలలో పోటీలలో విద్యార్థులు ఉత్సాహంగా పాల్గొన్నారు. ఈ సందర్భంగా ఏర్పాటు చేసిన సమావేశంలో జిల్లా అదనపు కలెక్టర్ రవి మాట్లాడుతూ క్రీడలు విద్యార్థుల్లో శారీరక దృఢత్వంతో పాటు మానసిక వికాసానికి, క్రమశిక్షణకు, ఆత్మవిశ్వాసానికి దోహదపడతాయని  పేర్కొన్నారు. క్రీడల ద్వారా నాయకత్వ లక్షణాలు అలవడతాయన్నారు. క్రీడల్లో అత్యుత్తమ ప్రతిభ కనబరిచి మంచి పేరును సాధించాలని విద్యార్థినులకు సూచించారు. ఈ కార్యక్రమంలో తహసీల్దార్ సురేష్ కుమార్, ఎం జె పి హనుమకొండ జిల్లా డిసిఓ స్టెల్లా, కమలాపూర్ ప్రిన్సిపల్ సౌజన్య, ఉమ్మడి వరంగల్ జిల్లా డి సి ఓ లు, వివిధ పాఠశాలలు, కళాశాలల ప్రిన్సిపల్స్, వ్యాయామ ఉపాధ్యాయులు, అధ్యాపకులు, ఉపాధ్యాయులు, విద్యార్థినులు పాల్గొన్నారు.

రిపోర్టర్: పవన్, కమలాపూర్, హనుమకొండ జిల్లా