భక్తిశ్రద్ధలతో నాగుల పంచమి వేడుకలు

సూర్య వీణవంక: నాగుల పంచమి పర్వదినాన్ని పురస్కరించుకుని మండలంలోని పలు గ్రామాల్లో మహిళలు భక్తిశ్రద్ధలతో నాగదేవతలకు ప్రత్యేక పూజలు నిర్వహించారు. ఉదయాన్నే మహిళలు నూతన వస్త్రాలు ధరించి నాగుల పుట్టల వద్దకు చేరుకుని పాలు, పసుపు, కుంకుమ, పూలతో నాగదేవతకు పూజలు చేసి మొక్కులు చెల్లించుకున్నారు. అనంతరం పుట్టలో పాలు పోసి కుటుంబ సభ్యుల సుఖసంతోషాలు, ఆయురారోగ్యాలు కలగాలని ప్రార్థించారు.ఈ సందర్భంగా మహిళలు మాట్లాడుతూ.. నాగుల పంచమి పండుగకు హిందూ సంప్రదాయంలో ఎంతో విశిష్టత ఉందని, నాగదేవతను భక్తిశ్రద్ధలతో పూజించడం ద్వారా కుటుంబానికి శుభం, సౌభాగ్యం కలుగుతుందని విశ్వసిస్తున్నామని తెలిపారు. తరతరాలుగా వస్తున్న ఆచారాలను పాటిస్తూ ప్రతి ఏటా నాగుల పంచమి వేడుకలను ఘనంగా నిర్వహిస్తున్నామని చెప్పారు.