telangana
భక్తి, విశ్వాసాలతోనే భగవత్ సాక్షాత్కారం
రవీంద్ర భారతి, మేజర్ న్యూస్ 15: నిష్కల్మషమైన భక్తి, అచంచలమైన విశ్వాసం ఉన్నచోట భగవంతుడు తప్పక కొలువై ఉంటాడని సద్గురువర్యులు డా. ఉమర్ ఆలీషా అన్నారు. భక్తి, విశ్వాసాలే మనిషికి నిజమైన సంపద అని పేర్కొన్నారు. ఆశ్రమంలోని విశ్వ విజ్ఞాన విద్య ఆధ్యాత్మిక పీఠంలో నిర్వహించిన ఆధ్యాత్మిక కార్యక్రమంలో భక్తులను ఉద్దేశించి ఆయన ప్రసంగించారు. పాలను, నీళ్లను వేరు చేసే హంస మాదిరిగా మనిషి కూడా భ్రాంతులను వీడి ఈశ్వరతత్వం వైపు పయనించాలని సూచించారు. ప్రతి ఒక్కరూ తమలోని ఆత్మతత్వాన్ని తెలుసుకుని 'అహం బ్రహ్మాస్మి' అనే ఆధ్యాత్మిక స్థితిని చేరుకోవాలని ఆకాంక్షించారు. మతమంటే భగవంతుడిని చేరుకునే మార్గమని, మార్గాలు వేరైనా చేరుకునే గమ్యం ఒక్కటేనని వివరించారు. శిఖరాన్ని చేరుకున్నప్పుడు అన్ని మార్గాలు ఒకటిగానే కనిపిస్తాయని పేర్కొన్నారు. కష్టాల్లోనూ భగవంతుడిని స్మరిస్తూ ముందుకు సాగే భక్తులకు ఆ పరమాత్మ ఎల్లప్పుడూ అండగా ఉంటాడని తెలిపారు. మనిషి ఒక నడిచే దేవాలయమని, మానవత్వాన్ని మించిన మతం లేదని ఉద్బోధించారు. మానవత్వమే ఈశ్వరతత్వమని స్పష్టం చేశారు.