telangana
భారతీయ సాంప్రదాయ కళలే శాశ్వతం ప్రముఖ సినీ రచయిత మరుధూరి రాజా
రవీంద్ర భారతి, మేజర్ న్యూస్ సినిమాలు, వినోదం తాత్కాలికమని, భారతీయ శాస్త్రీయ నృత్య, సంగీత కళలే శాశ్వతమని ప్రముఖ సినీ సంభాషణల రచయిత మరుధూరి రాజా పేర్కొన్నారు. శ్రీ సీతారామాంజనేయస్వామి దేవస్ధానం ప్రాంగణంలో జరిగిన
రాఘవ నృత్య సంగీత కళానిలయం ద్వితీయ వార్షికోత్సవ సభలో ఆయన ముఖ్య అతిథిగా పాల్గొని ప్రసంగించారు. పిల్లలకు చదువుతో పాటు కళలను నేర్పించడం ద్వారానే వారిలో సంస్కారం, వ్యక్తిత్వం వికసిస్తాయన్నారు. ప్రముఖ సినీ నటుడు చిట్టిబాబు మాట్లాడుతూ.. "కళలను ప్రోత్సహించడమంటే మన భావి తరాలకు మన గుర్తింపును అందించడమేనని పేర్కొన్నారు.
ప్రముఖ నృత్య కళా గురువు రుద్రవరపు కనకదుర్గ మాట్లాడుతూ.. టెక్నాలజీ ఎంత పెరిగినా మన మూలాలు, సంస్కృతి కళలలోనే ఉంటాయని తెలిపారు. ప్రాథమిక పాఠశాల దశ నుంచే బాలబాలికలకు సంగీతం, నృత్యం నేర్పించే దిశగా ప్రభుత్వం ఆలోచన చేయాలని ప్రముఖ వీణ విద్వాంసురాలు, సంగీత శిక్షకురాలు తూములూరి నాగలక్ష్మి కోరారు. ప్రముఖ కవి, వ్యాఖ్యాత, విశ్రాంత తెలుగు పండితులు భువనగిరి పురుషోత్తం అధ్యక్షత వహించిన కార్యక్రమంలో శ్రీ సీతారామాంజనేయ స్వామి దేవస్థానం ఛైర్మన్
ఎం. వాసుదేవరావు, మేనేజర్
కే. సర్వేశ్వర శాస్త్రి, లలిత కళారాధకులు మద్దాలి శ్రీనివాస్, వికారాబాద్ వెటర్నరీ డిపార్ట్మెంట్ అడిషనల్ డైరెక్టర్ కరవది నాగపూర్ణ చంద్రరావు, హైదరాబాద్ పెస్టిసైడ్స్ కంపెనీ లిమిటెడ్ ఎండీ కరవది శ్రీనివాస్ కుమార్ పాల్గొన్నారు. అతిథులను సంస్థ నిర్వాహకులు కరవది సాయిశరణ్య, సాయిశ్రావ్య ఘనంగా సత్కరించారు. ఈ వేడుకలకు ఆల్వకొండ సుమంత్, మద్దాలి జశ్వంత్, కరవది నాగ లక్ష్మి నిర్వహణా సహకారం అందించారు. సభకు ముందు కరవది శ్రీనివాస్ కుమార్ ప్రదర్శించిన 'రావణ బ్రహ్మ' ఏకపాత్రాభినయంతో పాటు
శ్రీ రాఘవ కూచిపూడి నృత్య సంగీత కళా నిలయం కళాకారులు ప్రదర్శించిన కూచిపూడి నృత్య ప్రదర్శనలు ఆకట్టుకున్నాయి.