అసైన్డ్ భూముల రైతులకు న్యాయం జరిగేలా చూస్తా
కొండాపూర్ ; మండల పరిధిలోని మునిదేవునిపల్లి గ్రామం సర్వే నంబర్ 92లో ఉన్న 293 ఎకరాల 14 గుంటల అసైన్డ్ భూముల భూసేకరణ వ్యవహారం రాజకీయంగా చర్చనీయాంశంగా మారింది. భూసేకరణలో రైతులకు అన్యాయం జరుగుతోందని, మధ్యవర్తులే లబ్ధి పొందుతున్నారని రైతులు ఆవేదన వ్యక్తం చేశారు. ఈ నేపథ్యంలో గ్రామ ఉపసర్పంచ్ పడమటి వరలక్ష్మి కృష్ణారెడ్డి ఆధ్వర్యంలో రైతులు హైదరాబాద్లో మాజీ మంత్రి, సిద్దిపేట ఎమ్మెల్యే హరీశ్రావును కలిసి తమ సమస్యలను వివరించారు. రైతులకు న్యాయం జరిగేలా పోరాడతామని హరీశ్రావు హామీ ఇచ్చినట్లు రైతులు తెలిపారు.
రూ.4 కోట్ల భూమికి రూ.22.75 లక్షల పరిహారమా?
ప్రభుత్వం టీజీఐఐసీ ద్వారా భూసేకరణ చేపట్టి గ్రామసభ నిర్వహించిందని, ఎకరాకు రూ.22.75 లక్షల చొప్పున పరిహారం నిర్ణయించిందని రైతులు హరీశ్రావు దృష్టికి తీసుకెళ్లారు. బహిరంగ మార్కెట్లో ఎకరా భూమి రూ.4 కోట్లకు పైగా ధర పలుకుతుండగా, తమకు కేవలం రూ.22.75 లక్షలే చెల్లించడం ఎంతవరకు సమంజసమని ప్రశ్నించారు. ఇప్పటివరకు సుమారు 75 శాతం మంది రైతుల ఖాతాల్లోనే పరిహారం జమైందని, మిగిలిన రైతులకు ఇంకా డబ్బులు అందలేదని వివరించారు. తరతరాలుగా సాగు చేసుకుంటూ జీవనోపాధి పొందుతున్న భూములను సేకరిస్తే తమ కుటుంబాల పరిస్థితి ఏమిటని ఆవేదన వ్యక్తం చేశారు.
ఇళ్ల స్థలాలు, ఉపాధికి హామీ ఇవ్వాలి
భూసేకరణ అనంతరం పరిశ్రమలు ఏర్పాటు చేసి స్థానికులకు ఉపాధి కల్పిస్తామని చెబుతున్నప్పటికీ, ఏయే పరిశ్రమలు వస్తాయి, రైతులకు ఎలాంటి ఉపాధి అవకాశాలు కల్పిస్తారనే విషయాలను స్పష్టంగా వెల్లడించడం లేదని తెలిపారు. భూములు కోల్పోతున్న రైతులకు న్యాయమైన పరిహారంతో పాటు ఇళ్ల స్థలాలు, ఉపాధి అవకాశాలు కల్పించిన తర్వాతే భూసేకరణ చేపట్టాలని కోరారు.
రైతులకు అండగా ఉంటా: హరీశ్రావు
రైతుల సమస్యలను విన్న హరీశ్రావు బలవంతపు భూసేకరణ చేయకూడదని, భూములు కోల్పోతున్న రైతులకు న్యాయబద్ధమైన పరిహారం చెల్లించాలని సూచించినట్లు రైతులు తెలిపారు. రైతులకు జీవనోపాధి, ఇళ్ల స్థలాలు కల్పించిన తర్వాతే భూసేకరణ చేపట్టాలని, ఏర్పాటు చేయనున్న పరిశ్రమలు, స్థానికులకు కల్పించే ఉపాధి అవకాశాలపై ముందుగానే స్పష్టత ఇవ్వాలని పేర్కొన్నట్లు వెల్లడించారు. రైతులకు తెలియకుండా సర్వేలు నిర్వహించడం సరికాదని, అసైన్డ్ భూముల భూసేకరణలో మధ్యవర్తుల ప్రమేయం, రైతులకు జరుగుతున్న అన్యాయంపై పోరాడాల్సిన అవసరం ఉందని వివరించినట్లు రైతులు తెలిపారు. మునిదేవునిపల్లి రైతులకు న్యాయం జరిగేలా అండగా ఉంటామని హామీ ఇచ్చినట్లు పేర్కొన్నారు. అవసరమైతే అసైన్డ్ భూముల వ్యవహారంపై న్యాయపోరాటం చేసేందుకు కూడా సిద్ధంగా ఉన్నామని రైతులు స్పష్టం చేశారు.ఈ కార్యక్రమంలో ఉపసర్పంచ్ పడమటి వరలక్ష్మి కృష్ణారెడ్డి, టీఆర్ఎస్ యువ నాయకులు ఫయాజ్, శ్రీకాంత్ రెడ్డి, ఎల్లారెడ్డి, మల్కా గౌడ్, ఆంజనేయులు గౌడ్, బుచ్చయ్య, శంకరయ్య, మందుల రాములు, ఎర్రోళ్ల బందయ్య, కుమ్మరి నర్సింలు, వెంకటయ్య, నర్సింలు, రామయ్య, శివయ్య, ఎల్లకొండ విష్ణు తదితరులు పాల్గొన్నారు