అర్హులైన ప్రతి ఒక్కరికీ ఉపాధి కల్పించాలి.. - అడిషనల్ డీఆర్డీఓ మల్లేశం

సూర్య - పెద్దపల్లి రూరల్ : వి.బి.జి. రామ్ జీ పథకంలో 100 శాతం పనులు అమలు చేయడంతో పాటు జాబ్ కార్డు కలిగిన అర్హులైన ప్రతి ఒక్కరికీ పని కల్పించాలని అడిషనల్ డీఆర్డీఓ మల్లేశం అధికారులకు సూచించారు. కూలీలకు వేతనాలు సకాలంలో అందించాలని, పనులు జరిగే ప్రదేశాల్లో తాగునీరు, నీడ తదితర కనీస సౌకర్యాలు ఏర్పాటు చేయాలని ఆదేశించారు.పెద్దపల్లి మండలంలోని బ్రాహ్మణపల్లి రైతు వేదికలో 17వ విడత ఉపాధి హామీ పథకం సామాజిక తనిఖీ ప్రజావేదికను నిర్వహించారు. ఈ సందర్భంగా 2025 ఏప్రిల్ 1 నుంచి 2026 మార్చి 31 వరకు జరిగిన ఉపాధి హామీ పనుల ఖర్చుల వివరాలను అధికారులు వెల్లడించారు.
సామాజిక తనిఖీ నివేదిక ప్రకారం మండలంలో మొత్తం 622 పనులు చేపట్టగా, వేతనాల రూపంలో రూ.5,09,63,567, మెటీరియల్ రూపంలో రూ.31,63,472 ఖర్చు చేశారు. మొత్తంగా రూ.5,41,27,039 వ్యయం జరిగినట్లు వెల్లడించారు. అటవీ శాఖ ఆధ్వర్యంలో ఒక పనికి రూ.1,96,859 ఖర్చు కాగా, పంచాయతీరాజ్ శాఖ పరిధిలో 41 పనులకు రూ.2,61,31,303 వ్యయం చేసినట్లు నివేదికలో పేర్కొన్నారు. అలాగే పంచాయతీరాజ్ పనులకు సంబంధించిన నేమ్ బోర్డుల ఏర్పాటు లో  అలసత్వం కు 16 వేలు , ఉపాధి హామీ పనులకు సంబంధించి ఫీల్డ్ అసిస్టెంట్లకు రూ.4,600 జరిమానా విధించినట్లు అడిషనల్ డీఆర్డీఓ తెలిపారు.ఈ కార్యక్రమంలో మండల ప్రత్యేక అధికారి బావ్ సింగ్, హెచ్‌ఆర్ రమేష్, ఎంపీడీఓ కొప్పుల శ్రీనివాస్, ఏపీవో రమేష్ బాబు, జూనియర్ క్యూసీ హరికృష్ణ, జేఈ రాజయ్య, సర్పంచులు, పంచాయతీ కార్యదర్శులు, ఫీల్డ్ అసిస్టెంట్లు తదితరులు పాల్గొన్నారు.