కార్మికుల ఆరోగ్యానికి భరోసా.. చర్లపల్లిలో ఈఎస్ఐ డిస్పెన్సరీ ప్రారంభం

కుషాయిగూడ. నవంబర్ 6 మేజర్ న్యూస్. పారిశ్రామిక ప్రాంతంలోని కార్మికులు, ఉద్యోగులకు మెరుగైన వైద్య సేవలు అందించాలనే లక్ష్యంతో చర్లపల్లిలో నూతనంగా నిర్మించిన ఈఎస్ఐ డిస్పెన్సరీ అందుబాటులోకి వచ్చింది. వి-గార్డ్ ఇండస్ట్రీస్ సంస్థ సామాజిక బాధ్యతలో భాగంగా తన వి-గార్డ్ హెల్త్ కేర్ కార్యక్రమం ద్వారా ఈ వైద్య కేంద్రాన్ని నిర్మించింది. నిర్మాణ పనులు 2026 మార్చిలో పూర్తయ్యాయి.

ఈఎస్ఐ డిస్పెన్సరీ ప్రారంభోత్సవ కార్యక్రమానికి రాష్ట్ర ఐటీ, ఎలక్ట్రానిక్స్‌ అండ్‌ కమ్యూనికేషన్స్‌, పరిశ్రమలు, వాణిజ్య శాఖల మంత్రి దుద్దిళ్ల శ్రీధర్‌బాబు ముఖ్య అతిథిగా హాజరయ్యారు. ఉప్పల్ ఎమ్మెల్యే బండారి లక్ష్మారెడ్డి ఆయనతో కలిసి కార్యక్రమంలో పాల్గొన్నారు.

ఈ కార్యక్రమానికి ప్రత్యేక అతిథులుగా టీఐఎఫ్‌ అధ్యక్షుడు కె. సుధీర్‌రెడ్డి, సీఎన్ఎంఐఏఎస్ఎస్‌ ఛైర్మన్‌ డాక్టర్‌ కె. గోవిందరెడ్డి, టీజీఐఐసీ జోనల్‌ మేనేజర్‌, కమిషనర్‌ బి. మధు, డీఎస్‌ రెడ్డి, సీఎన్ఎంఐఏఎస్ఎస్‌ ఉపాధ్యక్షుడు తాటి శ్రీనివాస్‌, కార్యదర్శి జి. రాఘవయ్య, సంయుక్త కార్యదర్శి పి. సురేష్‌, కోశాధికారి ఈ. మల్లికార్జునరెడ్డి, నిర్వహణ కమిటీ సభ్యులు పాల్గొన్నారు.

నూతన ఈఎస్ఐ డిస్పెన్సరీ అందుబాటులోకి రావడంతో చర్లపల్లి పారిశ్రామిక ప్రాంతంలోని వేలాది మంది కార్మికులు, ఉద్యోగులకు వైద్య సేవలు మరింత చేరువ కానున్నాయి. కార్మికుల ఆరోగ్య సంరక్షణకు, అత్యవసర వైద్య అవసరాల సమయంలో ఈ కేంద్రం ఎంతగానో ఉపయోగపడనుంది. పారిశ్రామిక సంస్థ సామాజిక బాధ్యతతో చేపట్టిన ఈ కార్యక్రమం కార్మిక వర్గానికి ప్రయోజనం చేకూర్చనుంది.