కొవిడ్ వ్యాక్సిన్ విక్రయాలతో మోడెర్నా ఆదాయ గైడెన్స్ పెంపు

సూర్య గ్లోబల్ మార్కెట్ డెస్క్: అంతర్జాతీయ బయోటెక్నాలజీ దిగ్గజం మోడెర్నా తన పూర్తి ఆర్థిక సంవత్సర ఆదాయ వృద్ధి అంచనాలనుగణనీయంగా పెంచింది. విదేశీ మార్కెట్లలో కొవిడ్-19 వ్యాక్సిన్ల విక్రయాలు పుంజుకోవడంతో పాటు భాగస్వామ్య ఒప్పందాల నుంచి ఆదాయం పెరగడం మూడో త్రైమాసికంలో ఊహించని ఆర్థిక ఫలితాలకు దోహదపడింది. గతంలో గరిష్టంగా 10 శాతం వరకు ఉంటుందని భావించిన వార్షిక ఆదాయ వృద్ధి అంచనాను కంపెనీ 15 నుంచి 25 శాతానికి సవరించింది. దీంతో అమెరికా స్టాక్ ఎక్స్ఛేంజీల్లో కంపెనీ షేర్లకు భారీగా కొనుగోళ్ల మద్దతు లభించింది.

క్యూ3లో లాభాల్లోకి మోడెర్నా.. $1.3 బిలియన్ల ఆదాయం
గత ఏడాది ఇదే త్రైమాసికంలో 200 మిలియన్ డాలర్ల నికర నష్టాన్ని నమోదు చేసిన మోడెర్నా, ప్రస్తుత మూడో త్రైమాసికంలో ఏకంగా 162 మిలియన్ డాలర్ల నికర లాభాన్ని ఆర్జించి అనలిస్టుల అంచనాలను తలకిందులు చేసింది. కంపెనీ మొత్తం త్రైమాసిక ఆదాయం వార్షిక ప్రాతిపదికన 29 శాతం వృద్ధితో 1.31 బిలియన్ డాలర్లకు ఎగబాకింది. ముఖ్యంగా అంతర్జాతీయ మార్కెట్లలో కొవిడ్ వ్యాక్సిన్ల డెలివరీలు వేగవంతం కావడం ఆదాయ వృద్ధికి ప్రధాన ఇంజిన్‌గా నిలిచింది.

పరిశోధన వ్యయాల నియంత్రణ, పటిష్టమైన నగదు నిల్వలు
ఆదాయం పెరగడమే కాకుండా కంపెనీ అమలు చేస్తున్న ఖర్చుల నియంత్రణ విధానాలు సైతం లాభదాయకతకు ఊతమిచ్చాయి. రీసెర్చ్ అండ్ డెవలప్‌మెంట్  వ్యయాలు 27 శాతం మేర తగ్గి 583 మిలియన్ డాలర్లకు పరిమితమయ్యాయి. అలాగే వార్షిక మూలధన వ్యయాల అంచనాను 200 మిలియన్ డాలర్లకు పరిమితం చేసింది. ప్రస్తుత ఆర్థిక సంవత్సరం ముగిసే నాటికి కంపెనీ వద్ద నగదు, పెట్టుబడుల నిల్వలు దాదాపు 8.1 బిలియన్ల నుంచి 8.3 బిలియన్ డాలర్ల శ్రేణిలో బలంగా ఉంటాయని యాజమాన్యం వెల్లడించింది.

పైప్‌లైన్ పురోగతిపై దృష్టి
కేవలం కొవిడ్ వ్యాక్సిన్లపైనే ఆధారపడకుండా కంపెనీ మెర్క్భా గస్వామ్యంతో అభివృద్ధి చేస్తున్న క్యాన్సర్ వ్యాక్సిన్ 'ఇంటిస్మెరాన్' రెగ్యులేటరీ ఆమోదాల ప్రక్రియ సరైన మార్గంలో ఉందని సంస్థ ధ్రువీకరించింది. అటు కార్యకలాపాలు లాభాల్లోకి మళ్లడం, ఇటు వార్షిక గైడెన్స్‌ను పెంచడం ఇన్వెస్టర్లలో నూతన విశ్వాసాన్ని నింపడంతో బయోటెక్ విభాగంలో మోడెర్నా షేర్లు లాభాల బాట పట్టాయి.