telangana
ప్రభుత్వ కార్యాలయాల్లో డిజిటల్‌ పాలనకు శ్రీకారం.. 350 మంది అధికారులకు శిక్షణ
మేడ్చల్ జిల్లా ప్రతినిధి, మేజర్ న్యూస్: ప్రభుత్వ కార్యాలయాల్లో పారదర్శకతను పెంపొందించడంతో పాటు పాలనను మరింత వేగవంతం చేసేందుకు డిజిటల్‌ విధానాలను అమలు చేస్తున్నట్లు జిల్లా ఖజానా అధికారి వెంకటేశ్వర్లు తెలిపారు. ఇందులో భాగంగా శుక్రవారం మేడ్చల్ జిల్లా కలెక్టరేట్‌లోని సమావేశ మందిరంలో ఈ-హెచ్‌ఆర్‌ఎంఎస్‌, ఈ-శాంక్షన్స్‌, వామిస్‌ మాడ్యూళ్లపై జిల్లా స్థాయి శిక్షణ కార్యక్రమాన్ని నిర్వహించారు. ఈ కార్యక్రమంలో జిల్లాకు చెందిన సుమారు 350 మంది అధికారులు, డ్రాయింగ్‌ అండ్‌ డిస్బర్సింగ్‌ ఆఫీసర్లు (డీడీఓలు) పాల్గొన్నారు.ఈ సందర్భంగా వెంకటేశ్వర్లు మాట్లాడుతూ.. ప్రభుత్వ కార్యాలయాల్లో ఉద్యోగుల సేవలు, ఆర్థిక లావాదేవీలు, అభివృద్ధి పనుల నిర్వహణలో డిజిటల్‌ విధానాలను వినియోగించడం ద్వారా పారదర్శకత పెరుగుతుందని వివరించారు. ఈ-హెచ్‌ఆర్‌ఎంఎస్‌ ద్వారా ఉద్యోగుల నియామకం నుంచి పదవీ విరమణ వరకు సంబంధించిన వివరాలు, పదోన్నతులు, సెలవులు, బదిలీలు తదితర సేవలను ఆన్‌లైన్‌లో నిర్వహించవచ్చని తెలిపారు.అలాగే ఈ-శాంక్షన్స్‌ విధానం ద్వారా ప్రభుత్వ వ్యయాలకు సంబంధించిన నిధుల మంజూరు, బిల్లుల ప్రక్రియను డిజిటల్‌ పద్ధతిలో చేపట్టవచ్చని వివరించారు. వామిస్‌ మాడ్యూల్‌ ద్వారా ప్రభుత్వ అభివృద్ధి పనుల అంచనాలు, సాంకేతిక అనుమతులు, ఒప్పందాలు, పనుల పురోగతిని ఆన్‌లైన్‌లో పర్యవేక్షించే అవకాశం ఉంటుందని పేర్కొన్నారు.ఈ మూడు డిజిటల్‌ విధానాల అమలుతో కార్యాలయాల్లో ఫైళ్ల జాప్యం తగ్గడంతో పాటు పరిపాలనలో జవాబుదారీతనం, పారదర్శకత పెరుగుతాయని తెలిపారు. ఉద్యోగులకు, ప్రజలకు ప్రభుత్వ సేవలు మరింత వేగంగా అందించేందుకు ఈ విధానాలు దోహదపడతాయని పేర్కొన్నారు. జిల్లాలోని అన్ని ప్రభుత్వ కార్యాలయాల అధికారులు, డీడీఓలు ఈ డిజిటల్‌ విధానాలను తప్పనిసరిగా పాటించాలని సూచించారు.ఈ శిక్షణ కార్యక్రమంలో జిల్లా పీఏఓ శర్మ, ఏటీఓ హైదర్‌ అలీ, ఎస్టీఓలు సాయికృష్ణ, అలివేలుమంగ, వినాయకరావు, జిల్లా ఖజానా కార్యాలయ సిబ్బంది, వివిధ ఉప ఖజానా కార్యాలయాల సిబ్బంది పాల్గొన్నారు.
