సూర్య సైదాపూర్ : హుస్నాబాద్ నియోజకవర్గంలోని దివ్యాంగులు, వయోవృద్ధులకు ఉచితంగా సహాయక ఉపకరణాలు అందించేందుకు అలింకో సంస్థ సహకారంతో రాష్ట్ర ప్రభుత్వం ఏర్పాటు చేసిన ప్రత్యేక వైద్య శిబిరాలను సోమవారం సైదాపూర్ మండల కేంద్రంలో మంత్రి పొన్నం ప్రభాకర్ ప్రారంభించారు. ఈ సందర్భంగా మంత్రి మాట్లాడుతూ.. హుస్నాబాద్ నియోజకవర్గంలోని ఏడు మండలాలు, మున్సిపాలిటీ పరిధిలో అర్హులైన వారందరినీ గుర్తించి కృత్రిమ కాళ్లు, చేతులు, వినికిడి యంత్రాలు, చంక కర్రలు, చేతి కర్రలు, వీల్చైర్లు, మోటరైజ్డ్ ట్రైసైకిళ్లు ఉచితంగా అందజేస్తామని తెలిపారు. నవంబర్ 16న సైదాపూర్లో ప్రారంభమైన శిబిరాలు 17న ఎల్కతుర్తి, 18న భీమదేవరపల్లి, 20న కోహెడ, 21న చిగురుమామిడి, 25, 26, 27 తేదీల్లో హుస్నాబాద్ మండలం, పట్టణంలో నిర్వహించి అనంతరం అక్కన్నపేటలో కూడా చేపడతామన్నారు. అధికారులు, ప్రజాప్రతినిధులు సమన్వయంతో అర్హులను శిబిరాలకు తీసుకురావాలని సూచించారు.హుస్నాబాద్ నియోజకవర్గంలో ఇప్పటికే 5 వేలకుపైగా కొత్త పెన్షన్లు మంజూరు చేశామని, అర్హత ఉండి పెన్షన్ రాని వారు తిరిగి దరఖాస్తు చేసుకోవచ్చని మంత్రి తెలిపారు. 360 డిగ్రీల పరిశీలన అనంతరం రాజకీయాలకు అతీతంగా అర్హత ఆధారంగా పెన్షన్లు అందిస్తున్నామని, పెన్షన్లు ఇప్పిస్తామని డబ్బులు అడిగే దళారులను నమ్మవద్దని హెచ్చరించారు.జిల్లా కలెక్టర్ చిత్రా మిశ్రా మాట్లాడుతూ.. చేయూత పథకం లబ్ధిదారులు అపోహలకు గురికావద్దని, ప్రతి దరఖాస్తును వ్యక్తిగతంగా పరిశీలించి అర్హులకు న్యాయం చేస్తామని తెలిపారు. లబ్ధిదారుల వివరాల నమోదు, స్క్రీనింగ్ కోసం ప్రత్యేక EDM సాంకేతిక ఏర్పాట్లు చేశామని, ఆధార్ లేదా సదరం సర్టిఫికెట్ లేని వారికి వాట్సాప్ ద్వారా ప్రింట్లు పొందే అవకాశం కల్పించామని వివరించారు. కరీంనగర్ జిల్లాలో ఇప్పటికే సుమారు 14 వేల మందికి స్క్రీనింగ్ పూర్తి చేసి ఆమోదం తెలిపామని, డిసెంబర్లో రెండో విడత వెరిఫికేషన్ చేపడతామని చెప్పారు. ఎంపీడీవో స్థాయిలో తిరస్కరించిన దరఖాస్తులపై డీఆర్డీఓ స్థాయిలో అప్పీల్ చేసుకునే అవకాశం ఉందన్నారు. ఈ కార్యక్రమంలో జిల్లా కలెక్టర్ చిత్రా మిశ్రా, జిల్లా సంక్షేమ అధికారి సరస్వతి, అలింకో ప్రతినిధులు, జిల్లా అధికారులు, సర్పంచులు, మార్కెట్ కమిటీ చైర్మన్లు, ప్రజాప్రతినిధులు, నాయకులు పాల్గొన్నారు.