telangana
అర్హులైన పట్టభద్రులందరూ ఎమ్మెల్సీ ఓటర్లుగా నమోదు చేసుకోవాలి: ఎమ్మెల్సీ అభ్యర్థి పట్లోళ్ల అమరేందర్ రెడ్డి
మోమిన్‌పేట, మేజర్ న్యూస్: అర్హులైన పట్టభద్రులందరూ ఎమ్మెల్సీ ఎన్నికల కోసం ఓటర్లుగా నమోదు చేసుకోవాలని ఎమ్మెల్సీ అభ్యర్థి పట్లోళ్ల అమరేందర్ రెడ్డి పిలుపునిచ్చారు. శుక్రవారం మోమిన్‌పేట మండల పరిధిలోని మొరంగపల్లి జిల్లా పరిషత్ ఉన్నత పాఠశాల, ప్రాథమికోన్నత పాఠశాలలను సందర్శించి పట్టభద్రులైన ఉపాధ్యాయులతో మాట్లాడారు. ఈ సందర్భంగా గ్రాడ్యుయేట్ ఓటరు నమోదుపై అవగాహన కల్పించారు.ఆయన మాట్లాడుతూ.. ఉమ్మడి రంగారెడ్డి, మహబూబ్‌నగర్, హైదరాబాద్ జిల్లాల పరిధిలోని అర్హులైన పట్టభద్రులందరికీ ఎమ్మెల్సీ ఓటరుగా నమోదు చేసుకునే అవకాశం ఉందన్నారు. ఎమ్మెల్సీ ఎన్నికల నామినేషన్ల దాఖలు చివరి రోజు వరకు కూడా ఓటరు నమోదుకు ఎన్నికల సంఘం అవకాశం కల్పించిందని తెలిపారు. 2023 నవంబర్ 1వ తేదీకి ముందు డిగ్రీ పట్టా పొందిన అర్హులైన పట్టభద్రులు ఓటరుగా నమోదు చేసుకోవచ్చని పేర్కొన్నారు.అర్హులైన ప్రతి ఒక్కరూ ఈ అవకాశాన్ని సద్వినియోగం చేసుకోవాలని, ఆన్‌లైన్‌లో ఫారం-18 ద్వారా గ్రాడ్యుయేట్ ఓటరుగా నమోదు చేసుకోవాలని సూచించారు. ప్రజాస్వామ్య ప్రక్రియలో పట్టభద్రులు భాగస్వాములు కావాలని కోరారు.ఈ సందర్భంగా పాఠశాల ఉపాధ్యాయులు పట్లోళ్ల అమరేందర్ రెడ్డిని శాలువాతో ఘనంగా సన్మానించారు. ఈ కార్యక్రమంలో ఉపాధ్యాయులు ప్రభాకర్, వెంకటయ్య తదితరులు పాల్గొన్నారు
