అర్హులైన ఓటర్లకు ఎన్నికల సంఘం మరో అవకాశం.!

పటాన్‌చెరు;ఓటరు జాబితాలో గైర్హాజరు, శాశ్వత వలసదారులుగా నమోదైనప్పటికీ,వాస్తవంగా ఓటు హక్కుకు అర్హులైన వారికి ఎన్నికల సంఘం మరో అవకాశం కల్పించిందని పటాన్‌చెరు నియోజకవర్గ ఎన్నికల నమోదు అధికారి (ఏఈఆర్‌వో ) వెంకటేశ్వర్లు తెలిపారు.అర్హులు సంబంధిత డిక్లరేషన్ సమర్పించి దరఖాస్తు చేసుకుంటే నిబంధనల ప్రకారం తుది ఓటరు జాబితాలో పేరు చేర్చేందుకు అవకాశం ఉంటుందని పేర్కొన్నారు. శనివారం రాజకీయ పార్టీల ప్రతినిధులు,సహాయ ఓటరు నమోదు అధికారులతో నిర్వహించిన సమీక్ష సమావేశంలో ఆయన ఈ విషయం వెల్లడించారు.నియోజకవర్గంలో మొత్తం 1,36,902 మంది ఏఎస్‌డీడీ జాబితాలో ఉండగా, 9,810 మంది మరణించినవారు, 29,676 మంది గైర్హాజరైనవారు, 82,918 మంది శాశ్వత వలసదారులు, 4,918 మంది ఇతరులుగా గుర్తించినట్లు తెలిపారు. అర్హులైన ఓటర్లు ఈ అవకాశాన్ని సద్వినియోగం చేసుకోవాలని, రాజకీయ పార్టీలు ప్రజలకు అవగాహన కల్పించి సహకరించాలని కోరారు.సమావేశంలో  తహసీల్దార్, సహాయ ఓటరు నమోదు అధికారులు, మున్సిపల్ డిప్యూటీ కమిషనర్లు, కమిషనర్లు, ఎంపీడీవోలు, ఎన్నికల డీటీలు సంతోష్ కుమార్, మహమ్మద్ షఫీ, పటాన్‌చెరు డీటీ లింగశేఖర్ పాల్గొన్నారు.రాజకీయ పార్టీల తరఫున బీఆర్‌ఎస్ నుంచి సుధాకర్ రావు, కాంగ్రెస్ నుంచి శశిధర్ రెడ్డి, టీడీపీ నుంచి నజీర్, బీజేపీ నుంచి రాజేందర్ రెడ్డి, బీఎస్పీ నుంచి ప్రశాంత్ హాజరయ్యారు.