కౌన్సిలర్ల చొరవతో డబిల్‌పూర్‌లో తీరనున్న తాగునీటి సమస్యలు
మేడ్చల్, మేజర్ న్యూస్: ఎల్లంపేట్ మున్సిపాలిటీ పరిధిలోని డబిల్‌పూర్ గ్రామ ప్రజల తాగునీటి ఇబ్బందులను తొలగించేందుకు స్థానిక కౌన్సిలర్లు, కాంగ్రెస్ నాయకులు ప్రత్యేక చొరవ తీసుకున్నారు. గ్రామంలో నీటి అవసరాలను దృష్టిలో ఉంచుకొని మూడు కొత్త బోర్లు వేయించడంతో పాటు వాటికి సీఆర్ఐ పంపులను ఏర్పాటు చేయించారు. దీంతో గ్రామంలో తాగునీటి సమస్యకు ఉపశమనం లభించనుంది. 23వ వార్డు కౌన్సిలర్ ఎండీ ఆరిఫ్, 14వ వార్డు కౌన్సిలర్ ఎర్రవల్లి విఘ్నేశ్వర్ రెడ్డి, 13వ వార్డు కౌన్సిలర్ సారా ముత్యాల గౌడ్, సొసైటీ డైరెక్టర్ చంగావుల మధుసూదన్ ఆధ్వర్యంలో ఈ పనులు చేపట్టారు. ఈ కార్యక్రమంలో మాజీ సర్పంచ్ సంజీవరావు, మాజీ కోఆప్షన్ సభ్యుడు అక్రమ్ పాషా, ఇందిరమ్మ కమిటీ సభ్యుడు భావన వెంకటేష్ యాదవ్, డబిల్‌పూర్ శివాలయ టెంపుల్ అధ్యక్షుడు సల్ల వెంకటేశ్ యాదవ్ తదితరులు పాల్గొన్నారు. గ్రామ ప్రజల తాగునీటి అవసరాలను గుర్తించి మూడు బోర్లు ఏర్పాటు చేయించిన కౌన్సిలర్లు, సహకరించిన నాయకులకు గ్రామస్తులు కృతజ్ఞతలు తెలిపారు. గ్రామ అభివృద్ధితో పాటు ప్రజలకు అవసరమైన మౌలిక సదుపాయాల కల్పనకు ఇదే విధంగా నిరంతరం కృషి చేయాలని కోరారు.
