అనుమతులు లేకుండానే మద్యం సేవనానికి ఏర్పాట్లు.. ఎక్సైజ్ అధికారుల నిఘా ఎక్కడ?
హుస్నాబాద్;ఉదయం పూట భోజనశాలలు.. రాత్రి అయితే మినీ వైన్స్, పర్మిట్ రూమ్లుగా మారుతున్నాయన్న ఆరోపణలు పట్టణంలో చర్చనీయాంశంగా మారాయి. ఎలాంటి అనుమతులు లేకుండానే కొన్ని ప్రాంతాల్లో మద్యం సేవించేందుకు ప్రత్యేకంగా సిట్టింగులు ఏర్పాటు చేస్తున్నారన్న విమర్శలు వినిపిస్తున్నాయి.పేరుకు భోజనశాలలు, రెస్టారెంట్లు.. కానీ రాత్రి వేళల్లో మాత్రం మద్యం సేవించే వారికి వేదికలుగా మారుతున్నాయన్న ఆరోపణలు ఉన్నాయి. మద్యం విక్రయాలు, సేవనానికి సంబంధించిన నిబంధనలు అమల్లో ఉన్నప్పటికీ వాటిని బేఖాతరు చేస్తున్నారనే విమర్శలు వెల్లువెత్తుతున్నాయి.పర్మిట్ రూమ్కు అనుమతి లేకపోయినా మద్యం సేవించేందుకు సిట్టింగ్ సౌకర్యాలు కల్పిస్తే దానిపై ఎక్సైజ్ శాఖ అధికారులు తనిఖీలు నిర్వహించాల్సిన అవసరం ఉందనే అభిప్రాయాలు వ్యక్తమవుతున్నాయి. అధికారిక నిబంధనల్లో వ్యాపార సమయాల ఉల్లంఘన, అనుమతి లేని కార్యకలాపాలపై జరిమానాలు, ఇతర చర్యలకు సంబంధించిన నిబంధనలు ఉన్నాయి.
అయితే క్షేత్రస్థాయిలో పరిస్థితి ఎలా ఉంది?
అధికారులకు సమాచారం లేదా?
తెలిసినా పట్టించుకోవడం లేదా?
తనిఖీల పేరుతో కేవలం కాగితాలకే పరిమితమవుతున్నారా?
ఎక్సైజ్ అధికారుల నిఘా ఏమైంది?:
రాత్రి వేళల్లో భోజనశాలల వద్ద సిట్టింగులు జరుగుతున్నాయన్న ఆరోపణలు నిజమైతే వాటిపై అధికారులు ఆకస్మిక తనిఖీలు నిర్వహించి వాస్తవాలను బయటపెట్టాలని స్థానికులు కోరుతున్నారు. అనుమతులు ఉన్నాయా? నిబంధనలకు అనుగుణంగానే కార్యకలాపాలు జరుగుతున్నాయా? అన్నది స్పష్టం చేయాలని ప్రజలలో డిమాండ్ వినిపిస్తుంది