అక్రమ లేఅవుట్.. ప్లాట్ల విక్రయం.. పీడీ యాక్ట్ ప్రయోగం!
రాంపల్లిలో వివాదాస్పద భూములపై అక్రమంగా లేఅవుట్ ఏర్పాటు చేసి విక్రయాలు :: పంజాల జైహింద్ గౌడ్పై నిర్బంధ చట్టం.. చర్లపల్లి జైలుకు తరలింపు
::మేడ్చల్ జిల్లా ప్రతినిధి, మేజర్ న్యూస్ (నవంబర్, 17):: వివాదాస్పద భూముల్లో అక్రమ లేఅవుట్ ఏర్పాటు చేసి, అమాయక ప్రజలకు ప్లాట్లు విక్రయిస్తూ మోసాలకు పాల్పడినట్లు ఆరోపణలు ఎదుర్కొంటున్న వ్యక్తిపై మల్కాజిగిరి పోలీసులు పీడీ యాక్ట్ ప్రయోగించారు. కీసర మండలం రాంపల్లి పరిధిలో చోటుచేసుకున్న ఈ వ్యవహారంలో పంజాల జైహింద్ గౌడ్ (63)పై ఈ నెల 13న నిర్బంధ చట్టం కింద చర్యలు తీసుకున్నారు. వివరాల్లోకి వెళితే.. రాంపల్లిలోని వివాదాస్పద భూముల్లో ఎలాంటి అనుమతులు లేకుండా లేఅవుట్ ఏర్పాటు చేసిన నిందితుడు, సదరు భూములకు స్పష్టమైన యాజమాన్య హక్కులు, చట్టబద్ధమైన అనుమతులు ఉన్నాయని నమ్మించి అమాయక కొనుగోలుదారులకు ప్లాట్లు విక్రయించినట్లు పోలీసులు వెల్లడించారు. ఈ వ్యవహారంలో 2026లో పోచారం ఐటీ కారిడార్ పోలీస్స్టేషన్లో ఆయనపై పలు కేసులు నమోదయ్యాయి. వరుసగా నమోదవుతున్న కేసుల నేపథ్యంలో ప్రజా ప్రయోజనాలను దృష్టిలో ఉంచుకుని పీడీ యాక్ట్ అమలు చేసినట్లు తెలిపారు. అనంతరం ఆయనను చర్లపల్లి కేంద్ర కారాగారానికి తరలించారు. ఈ సందర్భంగా మల్కాజిగిరి పోలీస్ కమిషనర్ బి. సుమతి, ఐపీఎస్ మాట్లాడుతూ.. భూకబ్జాలు, అక్రమ భూ లావాదేవీలు, ప్రజలను మోసం చేసే చర్యలకు పాల్పడే వారిపై కఠినంగా వ్యవహరిస్తామని హెచ్చరించారు.
ప్లాట్ల కొనుగోలుదారులు అప్రమత్తం! ప్రజలు ప్లాట్లు కొనుగోలు చేసే ముందు భూమి యాజమాన్య హక్కులు, టైటిల్ డాక్యుమెంట్లు, లేఅవుట్ అనుమతులు, ఇతర చట్టపరమైన అంశాలను పూర్తిస్థాయిలో పరిశీలించాలని పోలీసులు సూచించారు. కేవలం విక్రయదారుల మాటలు నమ్మి డబ్బులు చెల్లించవద్దని, మోసపూరిత రియల్ ఎస్టేట్ లావాదేవీల పట్ల అప్రమత్తంగా ఉండాలని విజ్ఞప్తి చేశారు.