telangana
ACR’S భృంగి జూనియర్ కళాశాలలో పోక్సో చట్టంపై అవగాహన కల్పించిన జడ్జి ఆర్. శాంతిలత
వికారాబాద్ జిల్లా ప్రతినిధి, మేజర్ న్యూస్: విద్యార్థులందరూ చట్టాలపై అవగాహన కలిగి ఉండాలని, మాదకద్రవ్యాలకు దూరంగా ఉంటూ క్రమశిక్షణతో కూడిన జీవితాన్ని అలవర్చుకోవాలని ప్రిన్సిపల్ జూనియర్ సివిల్ జడ్జి శ్రీమతి ఆర్. శాంతిలత సూచించారు. వికారాబాద్ జిల్లా న్యాయ సేవాధికార సంస్థ ఆధ్వర్యంలో సురక్షిత్ బచ్పన్ అభియాన్‌లో భాగంగా ACR’S భృంగి జూనియర్ కళాశాలలో నిర్వహించిన పోక్సో చట్టంపై అవగాహన కార్యక్రమంలో ఆమె పాల్గొని విద్యార్థులకు పలు సూచనలు చేశారు.ఈ సందర్భంగా జడ్జి ఆర్. శాంతిలత మాట్లాడుతూ… మైనర్లు వాహనాలు నడపరాదని, ట్రాఫిక్ నిబంధనలను తప్పనిసరిగా పాటించాలని పేర్కొన్నారు. మాదకద్రవ్యాల వినియోగం వల్ల కలిగే అనర్థాలను వివరించి, వాటికి దూరంగా ఉండాలని సూచించారు. చిన్నారులు, మైనర్లపై లైంగిక వేధింపులు, లైంగిక దాడులకు పాల్పడే వారిపై పోక్సో చట్టం కింద కేసులు నమోదు చేసి చట్టపరమైన చర్యలు తీసుకుంటారని తెలిపారు. విద్యార్థులు తమ హక్కులు, బాధ్యతలపై అవగాహన కలిగి ఉండాలని, ఎలాంటి వేధింపులు ఎదురైనా భయపడకుండా సంబంధిత అధికారులకు తెలియజేయాలని సూచించారు.ఈ కార్యక్రమంలో అసిస్టెంట్ లీగల్ ఎయిడ్ కౌన్సిల్ ఎం. శ్రీనివాస్, కళాశాల డైరెక్టర్ కుమారస్వామి, శివప్రసాద్, ప్రిన్సిపల్ మహేందర్ రెడ్డి, అధ్యాపకులు, విద్యార్థులు పాల్గొన్నారు.
