ఆసరా పెన్షన్ల మంజూరు పత్రాల పంపిణీ ఎన్నికల హామీ మేరకు పెంచిన పెన్షన్లు వెంటనే అమలు చేయాలి
కొండాపూర్ ; మండల కేంద్రమైన కొండాపూర్ గ్రామ పంచాయతీ పరిధిలో 53 మంది అర్హులైన వితంతువులు, గీత కార్మికులు, దివ్యాంగులకు నూతనంగా మంజూరైన ఆసరా పెన్షన్ల పత్రాలను గ్రామ సర్పంచ్ శ్రవంతి అమరేందర్ రెడ్డి ఆధ్వర్యంలో పంపిణీ చేశారు. ఈ సందర్భంగా వారు మాట్లాడుతూ ఆసరా పెన్షన్లు పేద కుటుంబాలకు ఆర్థిక భరోసాగా నిలుస్తాయని పేర్కొన్నారు. ఎన్నికల సమయంలో వృద్ధులు, వితంతువులు, దివ్యాంగులకు పెన్షన్లు పెంచుతామని ఇచ్చిన హామీ మేరకు ఎంత మొత్తం పెంచుతామని ప్రకటించారో, ఆ పెంపును ప్రభుత్వం వెంటనే అమలు చేయాలని కోరారు. అర్హులైన వారందరికీ పెరిగిన పెన్షన్లు అందించి పేదలకు ఆర్థిక భరోసా కల్పించాలని అన్నారు. ఈ కార్యక్రమంలో పంచాయతీ కార్యదర్శి ఓం ప్రకాష్, ఉపసర్పంచ్ రాజు, వార్డు సభ్యులు, గ్రామస్తులు, లబ్ధిదారులు పాల్గొన్నారు.