telangana

ఆన్‌లైన్ లోన్ యాప్స్ వేధింపులకు కానిస్టేబుల్ ఆత్మహత్య

Telangana 10 Nov 2026 67 views

హైదరాబాద్: ఆన్‌లైన్ లోన్ యాప్స్ నిర్వహకుల వేధింపులు తాళలేక ఓ పోలీస్ కానిస్టేబుల్ ఆత్మహత్యకు పాల్పడిన దారుణ సంఘటన పహాడీషరీఫ్ పోలీస్ స్టేషన్ పరిధిలో వెలుగుచూసింది.

పోలీసుల కథనం ప్రకారం, కొండపూర్ బెటాలియన్‌లో కానిస్టేబుల్‌గా విధులు నిర్వహిస్తున్న శ్రీను అనే యువకుడు కొద్దిరోజుల క్రితం అత్యవసర అవసరాల నిమిత్తం ఆన్‌లైన్ లోన్ యాప్ ద్వారా కొంత మొత్తం రుణం తీసుకున్నాడు. సకాలంలో ఆ మొత్తాన్ని చెల్లించడంలో ఆలస్యం కావడంతో, యాప్ నిర్వహకులు వేధింపులకు దిగారు. రాత్రీ పగలు తేడా లేకుండా పదేపదే ఫోన్లు చేస్తూ తీవ్ర ఒత్తిడికి గురిచేయడమే కాకుండా, ఆయన నగ్న చిత్రాలను రూపొందించి పంపుతూ వాటిని బంధువులు, మిత్రులకు పంపిస్తామని బెదిరింపులకు పాల్పడ్డారు.

ఈ తీవ్ర మానసిక వేధింపులు మరియు అవమానాన్ని భరించలేక కానిస్టేబుల్ తన ఇంట్లోనే ఉరివేసుకుని బలవన్మరణానికి పాల్పడ్డాడు. సమాచారం అందుకున్న పహాడీషరీఫ్ పోలీసులు సంఘటనా స్థలానికి చేరుకుని మృతదేహాన్ని స్వాధీనం చేసుకున్నారు. ఈ ఘటనపై కేసు నమోదు చేసుకుని దర్యాప్తు వేగవంతం చేశారు.