బలిపాడ్యమి సందర్బంగా శ్రీ మూలరాములకు మహాభిషేకం

మంత్రాలయం, సూర్య ప్రతినిధి బలిపాడ్యమి పర్వదినాన్ని పురస్కరించుకుని మంత్రాలయం శ్రీ రాఘవేంద్ర స్వామి మఠంలో విశేష ఆధ్యాత్మిక కార్యక్రమాలు భక్తిశ్రద్ధలతో నిర్వహించారు. ఈ సందర్భంగా మఠ పీఠాధిపతులు  శ్రీ సుభుదేంద్ర తీర్థ స్వామీజీ స్వయంగా శ్రీ బ్రహ్మ కరార్చిత శ్రీ మూలరాముల తో పాటు మఠంలోని ఇతర సంస్థాన దేవతామూర్తులకు మహాభిషేకాన్ని వైభవంగా నిర్వహించారు.
వేద మంత్రోచ్ఛారణలు, సంప్రదాయ పూజా విధానాల మధ్య జరిగిన ఈ మహాభిషేకం భక్తులకు ఆధ్యాత్మిక అనుభూతిని కలిగించింది. అనంతరం శ్రీ మూలరామదేవరు, శ్రీ దిగ్విజయ రామదేవరు, శ్రీ జయరామదేవరులకు స్వామీజీ అత్యంత భక్తిశ్రద్ధలతో పవిత్ర గంధలేపన కార్యక్రమాన్ని నిర్వహించారు. తదుపరి సంస్థాన పూజను శాస్త్రోక్తంగా జరిపించారు.
శ్రీ మఠ సంప్రదాయంలో మహాభిషేకానికి విశేష ప్రాధాన్యత ఉంది. ఏడాదిలో కేవలం రెండుసార్లు మాత్రమే ఈ అరుదైన పూజా కార్యక్రమాన్ని నిర్వహిస్తారు. శ్రీరామనవమి, బలిపాడ్యమి పర్వదినాల్లో నిర్వహించే ఈ మహాభిషేకం భక్తులకు అత్యంత పవిత్రమైన ఆధ్యాత్మిక ఘట్టంగా నిలుస్తుంది.
ఈ విశేష పూజా కార్యక్రమాన్ని తిలకించేందుకు వివిధ ప్రాంతాల నుంచి పెద్ద సంఖ్యలో భక్తులు మంత్రాలయానికి తరలివచ్చారు. భక్తి పారవశ్యంతో స్వామివారి సేవలో పాల్గొని శ్రీ మూలరామదేవరి దర్శనం చేసుకున్నారు. అనంతరం శ్రీ సుభుదేంద్ర తీర్థ స్వామీజీ నుంచి ఆశీస్సులు అందుకున్నారు.
భక్తి, సంప్రదాయం, ఆధ్యాత్మిక వైభవం కలగలిసిన ఈ మహాభిషేక వేడుకతో మంత్రాలయం శ్రీ రాఘవేంద్ర స్వామి కొరువైన  పుణ్యక్షేత్రం భక్తజన సందోహంతో ఆధ్యాత్మిక శోభను సంతరించుకుంది.
నల్లారెడ్డి, సూర్య ప్రతినిధి ఎమ్మిగనూరు కర్నూలు జిల్లా