30వ రోజుకు చేరిన జాతీయ ఆరోగ్య మిషిన్ కాంట్రాక్ట్ ఉద్యోగుల సమ్మె

సూర్య కామారెడ్డి జిల్లా ప్రతినిధి : కామారెడ్డి జిల్లా కేంద్రంలోని ధర్నా చౌక్ లో జాతీయ ఆరోగ్య మిషన్ కాంట్రాక్ట్ ఔట్సోర్సింగ్ ఉద్యోగుల నిరవధిక సమ్మె 30 రోజులకు చేరుకుంది. ప్రభుత్వం ఎటువంటి పరిష్కార మార్గాలు చూపకుండా తాత్సారం చేస్తుందని  ఎన్ హెచ్ ఎం ఉద్యోగులు ఆవేదన వ్యక్తం చేశారు. సమ్మెలో భాగంగా ప్రభుత్వ తీరు పట్ల వినూత్న నిరసన కార్యక్రమం చేపట్టారు. సమ్మె శిబిరంలో అడుగుల చిత్రాలు వేసి నిరసన తెలిపారు. "ఈ అడుగులు కేవలం అడుగులు కావని,గ్రామ గ్రామాన తిరిగిన అడుగులనీ,గర్భిణీ స్త్రీల ఆరోగ్యం కోసం నడిచిన అడుగులనీ,చిన్నారుల ప్రాణాలను కాపాడేందుకు పరుగెత్తిన అడుగులనీ,ప్రజారోగ్యం కోసం ఎన్నో సంవత్సరాలు అలుపెరగకుండా పనిచేసిన అడుగులనీ చూపించారు.కానీ ఇన్ని సంవత్సరాల ప్రజాసేవ తర్వాత కూడా తమ జీవితాలకు ఉద్యోగ భద్రత లేదని వాపోయారు.తాము జాలి అడగడం లేదనీ, తమ సేవకు తగిన న్యాయం అడుగుతున్నామని తెలంగాణ ప్రభుత్వాన్ని కోరారు.తమ అడుగులకు అలసట ఉండొచ్చనీ, కానీ తమ న్యాయపోరాటానికి అలసట ఉండదన్నారు.ఇన్ని అడుగులు ప్రజల కోసం నడిచాయని, తమ భవిష్యత్తు కోసం ప్రభుత్వం ఎప్పుడు అడుగు వేస్తుంది?" ప్రశ్నించారు. ఇకనైనా తమ హక్కుల సాధనకు ప్రభుత్వం కృషి చేయాలన్నారు. ఈ కార్యక్రమంలో డా.వేణుమాధవ్, డా.రాహుల్, వెంకట రమణ, పద్మజ, అశ్విని, రాజు, డా.మారుతి, డా.హరీష్, కళ్యాణ్, అంకుశ్, గీత, రవితేజ, అఖిల్, హిమబిందు, అరుణ, జయశ్రీ, నిర్మల, రాశి,శిరీష తదితరులు పాల్గొన్నారు.