108 అంబులెన్స్‌లోనే పండంటి బిడ్డకు జన్మనిచ్చిన మహిళ

బషీరాబాద్, మేజర్ న్యూస్: వికారాబాద్ జిల్లా తాండూర్ మండలం వి. మిట్టబాసపల్లి గ్రామానికి చెందిన ఓ గర్భిణీ మహిళ 108 అంబులెన్స్‌లోనే పండంటి బిడ్డకు జన్మనిచ్చింది. పురిటి నొప్పులతో బాధపడుతున్న ఆమెను ఆసుపత్రికి తరలిస్తుండగా మార్గమధ్యంలో నొప్పులు తీవ్రం కావడంతో 108 అంబులెన్స్ సిబ్బంది అప్రమత్తమయ్యారు. పరిస్థితిని గమనించి అంబులెన్స్‌లోనే సురక్షితంగా ప్రసవం చేశారు. అనంతరం తల్లీబిడ్డను సమీప ప్రభుత్వ ఆసుపత్రికి తరలించారు. ప్రస్తుతం తల్లీబిడ్డ ఇద్దరూ క్షేమంగా ఉన్నట్లు వైద్యులు వెల్లడించారు. అత్యవసర సమయంలో సమయస్ఫూర్తితో స్పందించి సురక్షిత ప్రసవానికి సహకరించిన 108 సిబ్బందికి కుటుంబ సభ్యులు కృతజ్ఞతలు తెలిపారు.

రిపోర్టర్: కాశీం పాషా, బషీరాబాద్, వికారాబాద్ జిల్లా.