వీధి కుక్కల దాడిలో... 23 గొర్రెలు మృతి

వీధి కుక్కల దాడి 23 గొర్రెలు మృతి చెందిన  సంఘటన చేవెళ్ల మండల పరిధిలోని ముడిమ్యాల గ్రామంలో జరిగింది. ఆ గ్రామానికి చెందిన మంద్ర మల్లేష్‌ గొర్రెల కాపరిగా జీవనం సాగిస్తున్నారు. రోజు మాదిరిగానే శనివారం గొర్రెలను మేపి మందలో ఉంచాడు. అర్ధరాత్రి దాటిన తర్వాత వీధి కుక్కలు దాడి చేయగా దాదాపు 23 గొర్రెలు మృత్యువాత పడగా మరిన్ని గొర్రెలకు గాయాలయ్యాయి. ఆదివారం ఉదయం గొర్రెల పరిస్థితిని చూసిన మల్లేష్ తీవ్ర ఆవేదనకు గురయ్యాడు.  రూ.3 లక్షల ఆస్తి నష్టం జరిగిందని బాధితుడు తెలిపాడు.

వీధి కుక్కల బెడదపై గ్రామస్తుల ఆందోళన

గ్రామస్తులు సంఘటనా స్థలానికి చేరుకుని బాధిత రైతును పరామర్శించి ధైర్యం చెప్పారు. గ్రామంలో వీధి కుక్కల బెడద రోజురోజుకూ పెరుగుతోందని, వాటి వల్ల ప్రజలు, పశువులకు ప్రమాదం పొంచి ఉందని ఆందోళన వ్యక్తం చేశారు. సంబంధిత అధికారులు వెంటనే స్పందించి వీధి కుక్కల నియంత్రణకు తగిన చర్యలు చేపట్టాలని కోరారు.

బాధిత రైతుకు పరిహారం అందించాలి

వీధి కుక్కల దాడిలో జీవనాధారమైన గొర్రెలను కోల్పోయిన మంద్ర మల్లేష్‌ను ప్రభుత్వం ఆదుకోవాలని,  అధికారులు క్షేత్రస్థాయిలో పరిశీలించి, బాధిత రైతుకు  తగిన పరిహారం అందేలా చూడాలని కోరారు. ఇలాంటి ఘటనలు పునరావృతం కాకుండా గ్రామంలో వీధి కుక్కల సమస్యకు శాశ్వత పరిష్కారం చూపాలని వేడుకున్నారు.

(చేవెళ్ల, మేజర్ న్యూస్)