నేరాల నియంత్రణలో సి.సి కెమెరాల పాత్ర కీలకం

కొత్త బ్రాహ్మణపల్లి లో 15 సిసి కెమెరాలు ప్రారంభించిన ఇబ్రహీంపట్నం ఏసిపి రాజు

అసాంఘీకశక్తుల ఆగడాలు, నేరాల నియంత్రణలో సి.సి కెమెరాల పాత్ర అత్యంత కీలకమైనదని ఇబ్రహీంపట్నం ఏసిపి రాజు అన్నారు. ప్రజల భద్రత, ఆస్థుల పరిరక్షణకు పోలీసు శాఖ చేపట్టే చర్యలకు సిసి కెమెరాల నిరంతర నిఘా ఎంతగానో దోహదం చేస్తుందని ఆయన పేర్కొన్నారు. మాడ్గుల మండలం కొత్త బ్రాహ్మణపల్లి గ్రామంలో సర్పంచ్ దుగ్గీంపూడి మర్రెడ్డి ఆర్థిక సహకారంతో ఏర్పాటుచేసిన 6 సిసి కెమెరాలు, అదేవిధంగా స్థానిక లూర్ధుమాత చర్చి ఆధ్వర్యంలో ఏర్పాటుచేసిన 10 కెమెరాల ప్రారంభోత్సవ కార్యక్రమాన్ని ఆదివారం నిర్వహించారు. ఈ కార్యక్రమానికి ఏసిపి కెవిపి రాజు ముఖ్య అతిధిగా హాజరై సర్పంచ్ మర్రెడ్డి, మండల మాజీ కో ఆప్షన్ సభ్యులు తుమ్మ జోజిరెడ్డి, సి.ఐ వేణుగోపాల్, ఎస్.ఐ రాఘవేందర్ గౌడ్, స్థానిక మాజీ సర్పంచ్, ఉపసర్పంచ్, వార్డుసభ్యులు, గ్రామస్థులతో కలిసి చర్చిలో ప్రత్యేక ప్రార్థనలు నిర్వహించి సి.సి కెమెరాలను ప్రారంభించారు. ఈ సందర్భంగా గ్రామస్థుల భద్రతను కాంక్షించి సొంత నిధులతో సిసి కెమెరాలు ఏర్పాటుచేసిన గ్రామ సర్పంచ్ దుగ్గీంపూడి మర్రెడ్డిని, లూర్ధుమాత చర్చి నిర్వహకులను ఏసిపి రాజు అభినందించారు. అనంతరం జరిగిన కార్యక్రమంలో సర్పంచ్, మాజీ కోఆప్షన్ సభ్యులు, మాజీ సర్పంచ్, పంచాయతి పాలకవర్గసభ్యులు ఏసిపి, సి.ఐ, ఎస్.ఐ లను శాలువాలతో సత్కరించి కృతజ్ఞతలు తెలిపారు.

 ఈ కార్యక్రమంలో మాజీ సర్పంచ్ బొమ్ము మంగమ్మ నాగయ్య, ఉప సర్పంచ్ బొమ్ము నవీన్ ( జోజి), వార్డు సభ్యులు లూర్ధురెడ్డి, కిషోర్ రెడ్డి,  గ్రామస్థులు పాల్గొన్నారు.

-ఆర్. నర్సింహ్మ, మేజర్ న్యూస్ : మాడ్గుల