త్రిపుర సుందరీదేవి దర్శనానికి భక్తుల వెల్లువ

ఇంద్రకీలాద్రి, మేజర్ న్యూస్: శరన్నవరాత్రి ఉత్సవాల్లో భాగంగా ఇంద్రకీలాద్రిపై శ్రీ బాలా త్రిపుర సుందరీదేవిగా అలంకృతమైన కనకదుర్గమ్మను దర్శించుకునేందుకు ఆదివారం భక్తులు పెద్ద సంఖ్యలో తరలివచ్చారు. అక్టోబర్ 11న ఆశ్వయుజ శుద్ధ పాడ్యమి సందర్భంగా ఉదయం 10 గంటల సమయానికి మొత్తం 17,576 మంది భక్తులు అమ్మవారిని దర్శించుకున్నారు. అన్ని క్యూలైన్లలోనూ భక్తులు భక్తిశ్రద్ధలతో అమ్మవారిని దర్శించుకుంటున్నారు. భక్తులకు ఎలాంటి ఇబ్బందులు కలగకుండా అధికార యంత్రాంగం విస్తృత ఏర్పాట్లు చేసింది. ప్రతి భక్తునికి సంతృప్తికర దర్శనం కల్పించడమే లక్ష్యంగా అధికారులు ప్రత్యేక చర్యలు చేపట్టారు. ఇందులో భాగంగా దివ్యాంగులు, వయోవృద్ధుల సౌకర్యార్థం బ్యాటరీ వాహనాలను అందుబాటులో ఉంచారు.