పంచాయతీ ఎన్నికల్లో బీసీ రిజర్వేషన్లపై ఏపీ ప్రభుత్వం కీలక ఉత్తర్వులు.. జీవో 153 జారీ!

సూర్య ప్రతినిధి, అమరావతి: రాష్ట్రంలో గ్రామీణ స్థానిక సంస్థల ఎన్నికలకు సంబంధించి ఆంధ్రప్రదేశ్ ప్రభుత్వం కీలక ఉత్తర్వులు జారీ చేసింది. పంచాయతీ ఎన్నికల్లో బీసీ రిజర్వేషన్లపై స్పష్టతనిస్తూ జీవో 153ను విడుదల చేసింది. బీసీలకు 34% రిజర్వేషన్లపై గతంలో జారీ చేసిన జీవో 105లో తగిన సవరణలు చేస్తూ ఈ తాజా ఉత్తర్వులు వెలువడ్డాయి. హైకోర్టు తీర్పు, సుప్రీంకోర్టు ఆదేశాలకు అనుగుణంగా ప్రభుత్వం ఈ నిర్ణయం తీసుకున్నట్లు స్పష్టం చేసింది.

50 శాతం నిబంధన అమలు.. డెడికేటెడ్ కమిషన్ సిఫార్సులు ఆమోదం

స్థానిక సంస్థల్లో రిజర్వేషన్ల ఖరారుపై ప్రభుత్వం అనుసరించాల్సిన మార్గదర్శకాలను జీవోలో స్పష్టం చేశారు.

 * 50% పరిమితి: ఎస్సీ, ఎస్టీ, బీసీలకు కలిపి మొత్తం రిజర్వేషన్లు ఎలాంటి పరిస్థితుల్లోనూ 50 శాతానికి మించకూడదని ఉత్తర్వుల్లో స్పష్టంగా పేర్కొన్నారు.

 * డెడికేటెడ్ కమిషన్ సిఫార్సులు: స్థానిక సంస్థల్లో బీసీ రిజర్వేషన్లపై డెడికేటెడ్ కమిషన్ ఇచ్చిన సిఫార్సులను ప్రభుత్వం అధికారికంగా ఆమోదించింది.

 * వార్డుల వారీగా ఖరారు: గ్రామీణ స్థానిక సంస్థల వారీగా బీసీ రిజర్వేషన్లను ఖరారు చేయాలని ఆదేశాలు జారీ అయ్యాయి. అలాగే ఎస్సీ, ఎస్టీ రిజర్వేషన్లను చట్ట నిబంధనల ప్రకారం నిర్ణయించాలని సూచించారు.

ప్రత్యేక నిబంధనలు, అధికారులకు ఆదేశాలు

గ్రామీణ స్థానిక సంస్థల్లో సీట్లు, పదవుల కేటాయింపు అలాగే రిజర్వేషన్ల రొటేషన్‌పై ప్రత్యేకంగా నిబంధనలు రూపొందించనున్నట్లు ఏపీ సర్కార్ తెలిపింది. ఈ జీవో 153 అమలుకు తక్షణ చర్యలు తీసుకోవాలని పంచాయతీరాజ్ కమిషనర్‌కు స్పష్టమైన ఆదేశాలు జారీ అయ్యాయి. ఈ ఉత్తర్వుల ప్రతులను రాష్ట్ర ఎన్నికల సంఘం (SEC), అన్ని జిల్లాల కలెక్టర్లు, సంబంధిత అధికారులకు పంపినట్లు సమాచారం.