ఉందానగర్ స్టేషన్ వద్ద చెత్త రాజ్యం..!

రంగారెడ్డి జిల్లాలోని జీహెచ్ఎంసీ శంషాబాద్ 118వ డివిజన్ పరిధిలో ఉన్న ఉందానగర్ రైల్వే స్టేషన్ పరిసరాలు చెత్తతో నిండిపోవడంతో దయనీయ పరిస్థితులు నెలకొన్నాయి. పారిశుధ్య నిర్వహణ పూర్తిగా లోపించడంతో స్థానికులు తీవ్ర ఇబ్బందులు పడుతున్నారు.
రైల్వే స్టేషన్‌కు వెళ్లే మార్గం నుంచి ప్లాట్‌ఫాం పరిసరాల వరకు ఎక్కడ చూసినా చెత్త కుప్పలే కనిపిస్తున్నాయి. వీటి నుంచి దుర్వాసన వెదజల్లుతుండటంతో పాటు దోమలు, ఈగలు విస్తరిస్తూ ప్రజలను ఇబ్బందులకు గురిచేస్తున్నాయి.
ప్రతిరోజూ వందలాది మంది ప్రయాణికులు రాకపోకలు సాగించే స్టేషన్ వద్ద ఇలాంటి అపరిశుభ్ర వాతావరణం నెలకొనడం ఆందోళనకరం. పారిశుధ్యం లోపంతో వ్యాధులు వ్యాప్తి చెందే ప్రమాదం ఉందని స్థానికులు హెచ్చరిస్తున్నారు.
ఇప్పటికైనా మున్సిపల్ అధికారులు స్పందించి పేరుకుపోయిన చెత్తను తొలగించి, శుభ్రత చర్యలు చేపట్టాలని, రోజువారీ చెత్త సేకరణను కచ్చితంగా అమలు చేయాలని కాలనీవాసులు డిమాండ్ చేస్తున్నారు.

(శంషాబాద్ - మేజర్ న్యూస్)