గవర్నర్ కోటా ఎమ్మెల్సీ స్థానాలపై గాంధీభవన్‌లో కాంగ్రెస్ కీలక భేటీ
హైదరాబాద్, సూర్య ప్రతినిధి : తెలంగాణలో ఖాళీగా ఉన్న గవర్నర్ కోటా ఎమ్మెల్సీ స్థానాల భర్తీ ప్రక్రియ వేగవంతమైంది. ఈ నేపథ్యంలో తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు బొమ్మ మహేష్ కుమార్ గౌడ్ నేడు ఆశావహులతో కీలక సమావేశం నిర్వహించనున్నారు. శనివారం ఉదయం 11 గంటలకు గాంధీభవన్‌లో ఈ భేటీ జరగనుంది.
ఈ స్థానాలను ఆశిస్తూ కాంగ్రెస్ పార్టీలోని పలువురు సీనియర్ నాయకులు, సమాజంలోని వివిధ రంగాలకు చెందిన ప్రముఖులు పోటీ పడుతున్నారు. ముఖ్యంగా టికెట్ ఆశిస్తున్న వారిలో గౌరి సతీష్, సత్తు మల్లేష్, అనిల్, చనగాని దయాకర్, బోరెడ్డి అయోధ్యరెడ్డి తదితరులు ప్రముఖంగా ఉన్నారు.
ఈ భేటీలో ఆశావహుల అభిప్రాయాలు, వారి సామాజిక సమీకరణాలు మరియు పార్టీకి వారు చేసిన సేవలను మహేష్‌గౌడ్‌ అడిగి తెలుసుకోనున్నారు. అనంతరం అభ్యర్థుల పేర్లతో కూడిన నివేదికను సిద్ధం చేసి ముఖ్యమంత్రి రేవంత్ రెడ్డితో పాటు కాంగ్రెస్ అధిష్ఠానానికి అందజేయనున్నారు. త్వరలోనే పార్టీ అధిష్ఠానం ఆమోదంతో అభ్యర్థుల తుది జాబితాను ఖరారు చేసి గవర్నర్‌కు సిఫార్సు చేయనున్నట్లు సమాచారం.
