భద్రాచలం చేరుకోనున్న సేవా సంకల్ప యాత్ర

భద్రాచలం, సూర్య ప్రతినిధి : ప్రధానమంత్రి నరేంద్ర మోదీ ప్రజాప్రతినిధిగా, ప్రభుత్వాధినేతగా 25 ఏళ్ల సుదీర్ఘ ప్రజాసేవను పూర్తి చేసుకోనున్న సందర్భంగా తలపెట్టిన 'సేవా సంకల్ప యాత్ర' శనివారం భద్రాచలానికి చేరుకోనుంది. ప్రధాని మోదీ అందించిన విశేష సేవలకు సంఘీభావంగా నిర్వహిస్తున్న ఈ బైక్ యాత్రకు స్థానిక నాయకులు, బిజెపి శ్రేణులు ఘనస్వాగతం పలకనున్నారు.

భద్రాచలం చేరుకున్న అనంతరం యాత్రికులు పవిత్ర పుణ్యక్షేత్రమైన శ్రీ సీతారామచంద్ర స్వామివారిని దర్శించుకుని ప్రత్యేక పూజలు నిర్వహించనున్నారు. తిరుపతి నుంచి ప్రారంభమైన ఈ యాత్ర భద్రాచలం మీదుగా ఆధ్యాత్మిక నగరం వారణాసి (కాశీ) వైపుగా సాగనుంది.

షెడ్యూల్ ప్రకారం ఈ సేవా సంకల్ప యాత్ర ఈ నెల 6వ తేదీన వారణాసికి చేరుకోనుంది. అనంతరం ప్రధాని మోదీ రాజకీయ, ప్రజాసేవారంగంలో 25 ఏళ్లు పూర్తి చేసుకునే ఆశ్వయుజ బహుళ విదియ (అక్టోబరు 7) సందర్భంగా ఈ నెల 7న వారణాసిలోని కాశీ విశ్వనాథునికి ప్రత్యేక అభిషేకం, ఆధ్యాత్మిక కార్యక్రమాలు నిర్వహించనున్నట్లు నిర్వాహకులు తెలిపారు.