అన్యాయాలపై పోరాటానికి ‘సత్యాగ్రహ’ డిజిటల్ ప్లాట్‌ఫామ్‌: ఆవిష్కరించిన రాహుల్ గాంధీ
న్యూఢిల్లీ: దేశవ్యాప్తంగా వివిధ వర్గాల ప్రజలు ఎదుర్కొంటున్న అన్యాయాలను ఎండగట్టేందుకు, వారి సమస్యలను వెలుగులోకి తెచ్చేందుకు లోక్‌సభ ప్రతిపక్ష నేత రాహుల్ గాంధీ శనివారం ‘సత్యాగ్రహ’ (Satyagraha) పేరుతో ఒక నూతన డిజిటల్ వేదికను ప్రారంభించారు. దేశంలో జరుగుతున్న వివిధ ఉద్యమాలు, పోరాటాలను ఒకే గొడుగు కిందకు తీసుకురావడమే లక్ష్యంగా ఈ ప్లాట్‌ఫామ్‌ను డిజైన్ చేసినట్లు ఆయన వెల్లడించారు.
ఈ వేదిక ద్వారా శాంతియుత ప్రతిఘటనకు, అధికారాన్ని ప్రశ్నించే తత్వానికి బలం చేకూరుతుందని రాహుల్ గాంధీ స్పష్టం చేశారు. ముఖ్యంగా రైతులు-భూమి హక్కులు, మహిళల భద్రత-సాధికారత, దళితులు, ఓబీసీల హక్కులు, అలాగే విద్యార్థుల సమస్యలు, పోటీ పరీక్షల అక్రమాలపై ఈ డిజిటల్ వేదిక ప్రత్యేకంగా దృష్టి సారిస్తుందని తెలిపారు.
అన్యాయానికి గురైన ప్రజలు తమ పోరాటాలు, సమస్యల వివరాలను ఈ ప్లాట్‌ఫామ్‌లో నమోదు చేసుకోవచ్చని రాహుల్ గాంధీ కోరారు. ప్రజా సమస్యల తీవ్రత, ప్రాధాన్యత ఆధారంగా సంబంధిత అంశాలపై కాంగ్రెస్ పార్టీ తరఫున, పార్లమెంట్ లోపల మరియు వెలుపల క్షేత్రస్థాయి పోరాటాలు నిర్వహిస్తామని ఆయన హామీ ఇచ్చారు.
