రైతుల కష్టాలు రేవంత్ రెడ్డికి కనిపించడం లేదా? -తిమ్మాజిపేటలో రైతుల మహాధర్నాకు మాజీ ఎమ్మెల్యే మర్రి జనార్దన్ రెడ్డి మద్దతు

ఎన్నికల సమయంలో రైతులకు ఎన్నో హామీలు ఇచ్చిన కాంగ్రెస్ పార్టీ, అధికారంలోకి వచ్చిన తర్వాత రైతులు ఎదుర్కొంటున్న సమస్యలకు పరిష్కారం చూపడంలో విఫలమవుతుంద న మాజీ ఎమ్మెల్యే మర్రి జనార్దన్ రెడ్డి అన్నారు. తిమ్మాజిపేట మండలం కేంద్రంలో  24 గంటల విద్యుత్ సరఫరా చేయాలని డిమాండ్ చేస్తూ రైతులు చేపట్టిన మహాధర్నాలో మాజీ ఎమ్మెల్యే మర్రి జనార్దన్ రెడ్డి పాల్గొని సంఘీభావం తెలిపారు. ఈ సందర్భంగా  మర్రి మాట్లాడుతూ ఒకవైపు రైతు సంక్షేమమే తమ ప్రభుత్వ లక్ష్యమని చెబుతూ, మరోవైపు విద్యుత్ సమస్యలతో రైతులు ఇబ్బందులు పడుతుంటే ప్రభుత్వం ఏం చేస్తోందని ప్రశ్నించారు. ముఖ్యమంత్రి రేవంత్ రెడ్డి మాటలకు, క్షేత్రస్థాయిలో రైతులు ఎదుర్కొంటున్న పరిస్థితులకు మధ్య ఉన్న వ్యత్యాసాన్ని ప్రభుత్వం గుర్తించాలని అన్నారు. రైతులు అప్పులు చేసి, పెట్టుబడులు పెట్టి, విత్తనాలు, ఎరువులు కొనుగోలు చేసి పంటలు సాగు చేస్తున్నారనీ , పంటలకు నీరు అందించాల్సిన కీలక సమయంలో విద్యుత్ సరఫరాలో అంతరాయాలు ఏర్పడితే రైతులు తీవ్రంగా నష్టపోయే ప్రమాదం  ఉందన్నారు.  కేసీఆర్ నాయకత్వంలోని గత బీఆర్ఎస్ ప్రభుత్వ హయాంలో వ్యవసాయానికి 24 గంటల ఉచిత విద్యుత్ సరఫరా విధానాన్ని అమలు చేశామని  ప్రస్తుత కాంగ్రెస్ ప్రభుత్వం కూడా రైతులకు నిరంతర విద్యుత్ అందించాల్సిన బాధ్యత నుంచి తప్పించుకోలేదని స్పష్టం చేశారు.
పి. వినయ్ కుమార్  నాగర్ కర్నూల్ క్రైమ్, సూర్య న్యూస్