బాల్యవివాహాలు సమాజానికి శాపం
వెల్దుర్తి, సూర్య ప్రతినిధి మేజర్ న్యూస్ బాల్యవివాహాలు సమాజానికి తీవ్ర నష్టాన్ని చేకూరుస్తాయని, నిబంధనలు ఉల్లంఘించి వివాహాలు జరిపిస్తే కఠిన చర్యలతో పాటు జరిమానాలు తప్పవని ఐసీడీఎస్ సూపర్‌వైజర్‌ పద్మావతి హెచ్చరించారు. బుధవారం ఐసీడీఎస్ ప్రాజెక్ట్‌ వెల్దుర్తి పరిధిలోని చెరుకులపాడు గ్రామంలో బాల్యవివాహాల నిర్మూలన, ఆరోగ్యం, చట్టాలపై గ్రామ ప్రజలు, కిశోర బాలికలకు అవగాహన సదస్సు నిర్వహించారు.ఈ సందర్భంగా ఆమె మాట్లాడుతూ.. చిన్న వయసులోనే పెళ్లిళ్లు చేయడం వల్ల అనేక ఆరోగ్య సమస్యలు తలెత్తుతాయని పేర్కొన్నారు. గర్భధారణ సమయంలో సరైన జాగ్రత్తలు తీసుకోకపోతే నెలలు నిండకుండానే ప్రసవమయ్యే ప్రమాదం ఉందన్నారు. దీనివల్ల తల్లితో పాటు బిడ్డ కూడా తీవ్ర అనారోగ్య బారిన పడే అవకాశాలు ఎక్కువని వివరించారు.
పోషకాహారం తప్పనిసరి:
ఆయుర్వేదిక్ వైద్యులు డాక్టర్ నాగరాజు మాట్లాడుతూ.. గర్భిణులు, బాలింతలు సమతులాహారం తీసుకోవాలని సూచించారు. పోషకాహార లోపం వల్ల కలిగే నష్టాలను వివరించారు. ఐసీపీఎస్‌ ప్రతినిధులు అత్యవసర సమాయాల్లో వినియోగించుకునే 1098, 181 ఉచిత హెల్ప్‌లైన్ నంబర్ల పనితీరుపై గ్రామీణులకు అవగాహన కల్పించారు.అనంతరం ఐసీపీఎస్‌ యూనిట్ సభ్యురాలు గీత మాట్లాడూతూ.. కిశోర బాలికలు సమాజంలో ఏ విధంగా నడుచుకోవాలి, తమ హక్కులు, చట్టాలపై అవగాహన పెంచుకోవాల్సిన ఆవశ్యకతను తెలియజేశారు.ఈ కార్యక్రమంలో ఐసీడీఎస్ సూపర్‌వైజర్లు పద్మావతి, భాస్కర్, ఆయుర్వేదిక్ వైద్యులు డాక్టర్ నాగరాజు, ఐసీపీఎస్‌ యూనిట్ సభ్యులు గీతావాణి, రామాంజనేయులు, సచివాలయ హెల్త్ అసిస్టెంట్ పురుషోత్తమ్, ఎంఎస్‌కే రేణుక, అంగన్‌వాడీ టీచర్లు నిర్మలాదేవి, సుమలత, అనంతమ్మ, హెల్పర్లు, ఆశా కార్యకర్తలు, కిశోర బాలికలు మరియు గ్రామ ప్రజలు పాల్గొన్నారు.
సూర్య ప్రతినిధి షేక్ దస్తగిరి కర్నూలు జిల్లా వెల్దుర్తి మండలం
